Një nga plazhet që po frekuentohet më së shumti vitet e fundit në Shqipëri është plazhi ranor i Darzezës në Fier, me një vijë bregdetare prej 15 kilometra përgjatë Adriatikut.

Historia e këtij plazhi fillon prej viteve ‘70 te shekullit te kaluar. Banorët e kësaj zone nuk janë autoktonë, por janë të ardhur nga fshati Darzezë i Gramshit, i cili u zhduk nga rrëshqitjet e dheut që pasuan në ato kohë. Ndaj edhe sot plazhi mban emrin e fshatit të dikurshëm të Darzezës.

Plazhi është ende i panjohur prej turistëve ndaj edhe shfrytëzohet më së shumti nga vendasit. Mirëpo krahasuar me vitet e kaluara, ky plazh po sheh një rritje të numrit të turistëve. Kjo lidhet kryesisht me investimet që po kryhen në infrastrukturë dhe në struktura akomoduese që po kryhen në këtë zonë turistike.

Plazhi i Darzezës është një nga plazhet më të virgjëra të Shqipërisë. Po ashtu, turistët krahas plazhit të Darzezës, mund të bëjnë gjithashtu edhe shëtitje në pyll, ekskursione dhe vizita në qendrat kulturore përreth.

Jo shumë larg nga Darzeza ndodhet edhe parku arkeologjik i Apolonisë, i cili është i vendosur mbi një kodër dhe pasqyron gjurmë nga qytetërimi i lashtë. Turistët mund të akomodohen në shtëpi me qira, të cilat variojnë nga 600 deri në 800 lekë shtrati në ditë.

Por, krahas tyre, mund të zgjedhin të qëndrojnë po ashtu edhe në një kompleks që ndodhet në këtë zonë me rreth 180 shtretër, i cili ofron një larmishmëri shërbimesh për turistët.