Nga Halil Teodori

E shkuara kur harrohet, rrezikon të përsëritet dhe brezit që ka mbi vete barrën e këtij faji i rëndon toka e të parëve, varret e etërve, gjiri i nënave u bëhet haram, amanetin i'a tret dheu e kushtrimin i'a përtypin malet.
Jo.
Historia është një pësim që nuk duhet mohuar si mësim.
Mundet me qenë i pafuqishëm,
Një dhimbje e plagëve që nuk i tresin kuja e nënave, mundet të jetë,
Një krim që ngjizet dhe rritet në barkun e një herezie, një mëkatimi që nuk e shfajëson asnjë shpagim, një faj që e mallkon çdo nënë që ka tundur djepin e jetës kreshnike.
Mundet të jetë një e pamundur që kafshon në plagë edhe kur e mendon ta lësh në mëshirën e harrimit gjithë atë gjëmë që u desh ta pagueje me më të lartin çmim.
Mundet të jetë faji më i fajshëm që nuk ka shëlbim që të pastron, kur në emër të... nuk e di se çfarë gjëje, ndoshta të tolerancës, ndoshta të një lloj vëllazërimi gjaku prej një gjaku të helmuar në zehrin e përdhunimeve, dhe pjellës që qau e nënës që klithinë kupë të qiejve që u thyen për të mos u ngjitur më kurrë.
Nuk mundt të ndodh e pagjasa... për të respektuar ata të shkuar mizore, atë që mëkon lëngimin e së tashmes;
...atë, atë identitet barbar që ka luftuar me zjarr e me hekur qenien tënde,
...atë që ka minuar në gjenezë dhe themele identitetin tënd kombëtare,
...atë që zbatoi format më mizore dhe aplikoi monstruozitetet më të pashembulltat për të të nënshtruar, për të të detyruar të ndërrosh fenë e të parëve,
...atë që i përdori bijtë e tu mish për topat e tij të luftës pushtuese,
...atë që e vaditi këtë tokë me gjak të pafajshëm dhe e mbolli kudo me varre,
...atë përjetësisht të urryer
... atë përjetësisht të pafalshëm.
Nëse sot thërret harrimi, harruar qofsh se ke jetuar në këtë tokë, se je prehur nën këtë dhe, që ke ëndërruar me këto zana.
...harrimi me harrim të shpërbleftë
Nëse sot e bën këtë
... e bën këtë i prirur nga interesa të ngushta financiare, duhet të mos kërkosh nesër pendesë dhe falje për fajin e tradhtisë, tradhtisë së gjakut tënd, tradhtisë së flamurit tënd, poshtërimit të asaj që ke më të shtrenjtë e më të shenjtë, kombit. @halilteodori., " GJURMET"