Emisioni BOOM ka publikuar fakte mbi mënyrën se si bëhet grumbullimi i lëndës së parë nga ana e baxhove, në kundërshtim me ligjin “Për prodhimin, grumbullimin, përpunimin dhe tregtimin e qumështit dhe të produkteve me bazë qumështi” në vendin tonë. Herët në mëngjes, fshatarët dalin me kova  bojrash, të mbushura me qumësht dhe presin furgonat e baxhove, mjete këto jofrigoriferike, ndryshe nga sa parashikon ligji.

I gjithë aktiviteti kryhet në informalitet të plotë. Baxhot blejnë me para në dorë, duke mos dhënë asnjë kupon tatimor. Çmimi i një litri qumësht varion nga 35-38 lekë. Teksa nga njëra anë fermerët e quajnë këtë çmim të ulët, nga ana tjetër ata shprehen të vetëdijshëm se nuk plotësojnë kushtet për formalizimin e këtij aktiviteti.
Sipas ekspertit Kristaq Jorgo, qumështi i marrë direkt nga fshatarët është jashtë kontrollit, pasi këta të fundit nuk plotësojnë kërkesat e ligjit:

Sipas tij, ambjenti ku mbahen kafshët dhe ai i mjeljes duhet të jenë të veçanta, fermeri duhet të jetë i pajisur me librezë shëndetësorë, enët duhet të jenë inoksi, ndërsa qumështi duhet të transportohet me mjete frigoriferike.
Duke ndjekur mjetet që bënë grumbullimin, BOOM zbuloi se baxhot që punonin me këtë qumësht si lëndë të parë, ishin vendosur në ambjentet ku pronarët kishin edhe shtëpitë e tyre, përkatësisht në Lezhë dhe Fushë Mamurras.
Qumështi i grumbulluar jashtë rregullave të përcaktuara në ligj si dhe funksionimi i baxhove në oborret e shtëpisë së pronarëve të tyre, cënon rëndë sigurinë ushqimore, veçanërisht atë të produkteve delikate të bulmetit.