Nga Kastriot Dervishi
Legjislativi i shtetit shqiptar filloi jetën e vet në vitin 1920 në Tiranë. Deri në vitin 1926 punimet e tij u zhvilluan në godinën e Zija Toptanit (sot Akademia e Shkencave). Në vitet 1925-1928 Shqipëria pushtetin legjislativ e kishte në dy dhoma: Senatin dhe Dhomën e Deputetëve. Senati u vendos qysh në vitin 1925 në godinën që e njohim sot si teatrin e kukullave. Një vit më vonë aty u vendos edhe Dhoma e Deputetëve. Të dy këto organe përbënin Asamblenë Kushtetuese.
Fotoja bashkëlidhur që ruhet në AQSH, ka prapa shënimin e Mit’hat Frashërit se është ceremonia e fillimit të sesionit të parë të Dhomës së Deputetëve, datë 15 shtator 1926. Sipas procesverbaleve të kohës, sesioni parlamentar ka filluar të shtunën e 18 shtatorit, ndërsa nuk njoftohet nëse kjo e datës 15 shtator ka qenë ceremoni vetëm hapje. Lajmin për godinën e jep gazeta “Telegraf”. Në foto dallohen Pandeli Evangjeli (kryetar i Senatit), Kostaq Kotta (kryetar i Dhomës së Deputetëve), Musa Juka, Selaudin Blloshmi, etj.
