Makineria e propagandës, njerëzit e blerë nga pushteti, shërbëtorë të qeverisë dhe ata të inatit të vjehrrës që flenë me mullixhiun, janë vënë në lëvizje për të sfumuar protestën e studentëve.
Pasi e panë që nuk e ndaluan dot me epitete fyerës si “ngelsa”, makineritë e joshjes qeveritare kanë aktivizuar në media shërbyesit që të thonë se kjo protestë duhet të mbetet në minorancë, pa përkrahjen e shqiptarëve, pa përkrahjen e partive politike, pa përkrahjen e grupeve të tjera sociale që edhe ata si studentët janë kundër arrogancës dhe hajdutërisë së pushtetit.
Individë që e kishin harruar prej muajsh ekranin, befas u aktivizuan dje, sot, do aktivizohen nesër, për të goditur reagimin e fuqishëm të studentëve.
Këta zëra dhe pagatorë të ndryshëm dalin dhe flasin për shkak se po pretendojnë të kapin ndonjë pjesë torte nga pozicionet shtetërore, njësoj si hsokët e tyre që befas pushteti i sotëm, dje në opozitë i njolloste si grabitqarët e popullit, po ju siguron karrige institucionesh.
Ata po hedhin teza të ndryshme se është armiqësore që opozita të jetë pjesë e ideve dhe protestave studentore. Këta pagatorë mjeranë, po arrijnë deri aty sa i udhëzojnë studentët që të mos pranojnë as pedagogë të ndershëm si Edmond Tupe, etj, vetëm e vetëm që protesta të mbetet në minorancë dhe bashkë me ata mos bëhen intelektualë të këtij vendi.
Por kot edhe kjo punë, të dashur pagatorë të pushtetit. Studentët e kanë të mbushur mendjen, nuk keni se çfarë t’u mbushni më. Kështu që vazhdoni, shtoni dozat dhe rritni përfitimet pushtetore./ REDAKSIONALE