Nga Petrit Vasili

Buxheti i 2019 po "shëtit" nëpër komisionet parlamentare, po bën adetin apo qokën si prelud i vjedhjes gjigande të radhës. 

Shkollëpakësia ka ndërtuar një buxhet mediokër e shkatërrimtar si ditë e zezë për ekonominë e mijëra familjeve shqiptare, ndërsa hajdutëria ka ndërtuar një buxhet si ditë e bardhë për oligarkët bashkëklientë të pushtetit.

Asnjë element vizionar, asnjë shpresë për ulje të pabarazisë shoqërore, asnjë lajm i mirë për të varfërit, asnjë ndryshim në shëndetësi e arsim, asgjë për bujqësinë, taksa më të larta.

Ku është shëndetësia falas, premtimi më idiot por edhe më i poshtër e më shkatërrimtar i shkollëpaktit, që praktikisht po zhbën çdo ditë shëndetësinë kombëtare.

Por është shumë i qartë dhe vizionar ky buxhet në pagesat e koncensioneve, që mbushin xhepat e oligarkisë dhe qeverisë.

Një borxh kombëtar që vetëm rritet dhe në mënyrë kriminale fshihet e arrin mbi 72%.

Thellimi i varfërisë, që i dëbon shqiptarët nga atdheu i tyre.

100 milionë euro pagesa për koncensione.

40 milionë dollarë taksa më shumë.

1 e treta e të ardhurave grabitet në taksa që nuk prodhojnë shërbime.

Dhjetëra mijëra familjeve që u hiqet ndihma ekonomike dhe flaken në skamje.

Asnjë investim madhor i huaj apo në infrastrukture që rrit ekonominë por mbi të gjitha punësimin.

Asnjë shpresë për ulje të papunësisë.

Këto janë lajmet e zeza që vijnë nga një buxhet i përgatitur nga hajdutëria dhe shkollëpakësia të bëra bashkë.

Ky është buxheti që iu ofron shqiptarëve vetëm largimin nga vendi pasi ua kthen përditshmërinë atyre në një ferr mbijetese të pamundur.