Përfaqësues të Partisë Demokratike, janë në Qytet Studenti për të kujtuar dhe nderuar 8 Dhjetorin 90', ditën kur rinia i dha grushtin diktaturës komuniste dhe i hapi rrugën Lirisë dhe Demokracisë.

I pranishëm në këtë aktivitet, është ish-kryeministri Sali Berisha, kreu i Pd-së, Lulzim Basha dhe deputetë të opozitës.

Ish-kryeministri Sali Berisha ka mbajtur një fjalë para të pranishmëve, duke i cilësuar si hero, atë studentë që dolën përballë.

Berisha tha se studentët ishin hero pasi ata dolën kundër diktaturës më të egër të europës.

"Ditë si kjo janë ditë kujtimesh mbresash në të vërtetë për mua këto janë ditët e shtrëngatave emocionale të fuqishme, për ato përjetime të 28 viteve më parë. Janë ditët e gjenezës në 28 vite kemi pasur ditë të mëdha, të bekuara edhe të vështira, por ditët e dhjetorit 90 janë ditët e gjenezës në këto tre dekada të kombit shqiptar. Për mua janë ditët ku unë përjetova mrekullinë më të madhe të jetës sime sepse, ato ditë unë do të kisha përballë, një grup studentësh 500 por edhe 1000 që në rrugën afër rrugës Elbasanit ishin pozicionuar përball autoblindave tankeve, të gjitha llojeve të armëve. Ishin të vetmuar, 15-16 qytetarë ishin afër tyre, por ishin të pamposhtur ishin heronj. Asnjë nuk thotë se unë isha hero, por vërtetë ato ishin heronj të vërtetë të Kombit shqiptar. Ishin heronj të pamposhtur”, deklaroi Berisha.