Ka më shumë se dy javë që në Spanjë e Itali diskutohet për transferimin e Luca Modric. Për kroatin ka pasur me të vërtetë tratativa, por spanjollja “AS” së fundmi ka dalë me njoftimin se 32-vjeçari ka vendosur të qëndrojë te Real Madrid.
Ky burim bën me dije se futbollisti më i mirë i Botërorit ka qenë i tunduar nga oferta e zikaltërve që i ka ofruar një kontratë 4-vjeçare me 10 mln euro në sezon plus 2 vite të tjera te kinezët e Jiangsu Suning, skuadër e cila ka pronar të njëjtë me të Interit.
“AS” shkruan se kjo ka qenë dëshira e lojtarit që në fillim të kësaj historie pavarësisht se ai ka heshtur. Po ky burim shton më tej se se pas bisedës që ka pasur me familjarët Modric ka vendosur përfundimisht të qëndrojë te Real Madrid.
Për ta bindur ‘galaktikët’ i kanë premtuar rritje rroge, pasi 6.5 milionë eurot që përfiton aktualisht janë larg asaj që merr Ramos dhe Bale, nga 11 milionë euro, apo Benzema dhe Kroos, nga 8.5 milionë euro.
