Jemi në javën e 13-të Superligës dhe për habinë e të gjithëve Teuta ndodhet mbi Kukësin në tabelën e renditjes dhe kjo e gjitha falë pesë rezultateve pozitive radhazi.

Aktualisht durrsakët janë 1 pikë mbi Kukësin duke u renditur kështu në vendin e katërt.

Verilindorët kanë pasur jo pak luhatje gjatë këtij edicioni, lidhur ndoshta dhe me faktin që skuadra këtë vit nuk po luan në “Zeqir Ymeri”, që ishte shndërruar në një “kështjellë” për kuksianët, duke lëvizur në 4 impiante të ndryshme për ndeshjet shtëpiake në vetëm 12 javë, aq sa sfida me durrsakët do të luhet tashmë në “Selman Stërmasi”, teksa më parë ka prekur dhe fushën e “Elbasan Arenës”, “Loro Boricit” por dhe stadiumit të Kamzës.

Ndonëse për momentin Teuta është në një formë më të mirë se formacioni i Cungut, Kukësi deri diku është shndërruar në një makth për durrsakët, që në transfertë nuk kanë mundur të fitojnë asnjëherë ndaj nënkampionëve të Shqipërisë, teksa numërojnë vetëm dy barazime dhe ato në vitin e ngjitjes së Kukësit në Superiore.

Megjithatë, forma e treguar nga formacioni i Shkëmbit në javët e fundit dhe, mbi të gjitha, rezultatet e arritura me përmbysje të bëjnë të mendosh se Teuta këtë herë do të provojë ta thyejë këtë tabu, dhe pse te Kukësi ka rikthime të rëndësishme si Melo dhe kapiteni Shameti, që duket se është riaftësuar 100%, ndërkohë që gjatë javës dhe Simon Rrumbullaku rinisi stërvitjen me grupin.

Takimi do të zhvillohet në orën 14:00 në stadiumin ‘Selan Stërmasi’.