Një studim i ri tregon se serbët nuk dëshirojnë ta sakrifikojnë hyrjen e tyre në BE ose të bëjnë ndonjë sakrificë personale për Kosovën.
Një studim i ri i bërë në mes të 17 dhe 27 dhjetorit nga “Open Society Foundation” dhe IPSOS Strategic Marketing, i publikuar të martën, tregoi se vetëm një pakicë e vogël e të anketuarëve e shohin Kosovën si ndër problemet më të mëdha me të cilat përballet vendi i tyre.
“Duke folur për priotitetet me të cilat qeveria duhet të merret, çështja e Kosovës është shumë prapa çështjeve ekonomike, shëndetit dhe korrupsionit”, thanë autorët e studimit.
Vetëm tetë për qind thanë se Kosova është prioritet, 22 për qind se Kosova është ndër tre prioritetet kryesore. Ndërsa më shumë se gjysma thanë se nuk i përcjellin lajmet në lidhje me Kosovën, kurse më shumë se një çerek thanë se përcjellin vetëm lajmet kryesore./ Express
