Tragjedia e Munsterit, ku 3 persona u vranë nga një sulm me mikrobus, në fund rezultoi se nuk ishte një akt terrorist.
Sipas gazetës “Süddeutsche Zeitung”, autori i krimit ishte një 48-vjeçar vendas me probleme psikike.
“Bild” nga ana tjetër sqaron se agresori që përdori automjetin për t’u vërsulur mbi turmën e njerëzve, nuk ka qenë person i njohur për policinë.
Ai vrau veten menjëherë pas ngjarjes, duke përdorur një armë zjarri.
Policia gjermane ka kontrolluar apartamentin e 48-vjeçarit për të zbuluar nëse mbante lëndë shpërthyese e po kontakton edhe me ata që e njihnin.
Mediat raportojnë se 6 prej 20 të lënduarve nga incidenti, janë në gjendje të rëndë. Tragjedia ndodhi në restorantin tradicional ‘Kiepenkerln’.
Kryebashkiaku i Munsterit, Markus Lewe tha në komentet për shtyp se i gjithë qyteti mban zi për këtë ngjarje të tmerrshme, duke shprehur ngushëllimet për familjet e viktimave si dhe shpresën për shërim të shpejtë të të plagosurve.
