vettingu Archives - 55 News

Debati për reformën në drejtësi/ Lubonja: Vettingu u bë në mënyrë selektive nga grupe të lidhura me maxhorancën

Koz Dynjaja — Fri, 24 Jan 2020 08:47:25 +0000

Analistë të ftuar në studion e emisionit “Real Story” në “News 24” kanë debatuar për reformën në drejtësi. Analisti Fatos Lubonja deklaroi se dyshon shumë tek reforma në drejtësi, për shkak se edhe vettingu u bë në mënyrë selektive, duke mbështetur grupet e lidhura me maxhorancën.

Arjan Vasjari u shpreh se do të ishte mirë që të besojmë tek SPAK-u dhe reforma në drejtësi, në kushtet që kjo është e vetmja drejtësi më e mira që njohim. Gazetari Skënder Minxhozi tha se reforma në drejtësi duhet besuar dhe nuk mund ta gjykojmë, kur ende nuk kemi rezultate.

Fatos Lubonja: Unë s’po them tani në këtë moment që PS ka kapur të gjithë reformën në drejtësi. Sigurisht që ka “mbeturina” siç thoshte shoku Enver. Por ajo skandali DH Albania ishte që gjithë qeveria duhet të binte. Ke katër vjet që flet kështu.

Skënder Minxhozi: Plepat ishte shkolla e njerëzve të drejtësisë. Ekziston SPAK dhe është neonatë. Ku e di ti që ka katër vjet që flas kështu. Prokurori i Përgjithshëm nuk merr më vendime. SPAK ka filluar punën. Nuk mund ta atakosh dot kur nuk ka balancë.

Fatos Lubonja: Kjo që thua është shumë e rëndë. Se thua se këta do na bënkan drejtësinë, si shpata e drejtësisë në kohën e Enverit.

Arjan Vasjari: SPAK duhet të provohet. Mos ta paragjykojmë. T’i japim mundësi, sepse nuk kemi mundësi tjetër.

Fatos Lubonja: Kur na kanë folur për reformën në drejtësi na kanë folur në përgjithësi për vettinge etj. Madje fjala më e madhe ka qenë vetting sesa SPAK. Madje na kanë thënë se pas vettingut do na dalin njerëz të ndershëm mbi partitë që do të bëjnë pastrimin e politikës. Tani nëse unë shikoj se vettingu bëhet në mënyrë selektive nga grupe që lidhen me maxhorancën, dyshoj shumë te reforma në drejtësi.

Arjan Vasjari: Fol me prova në mundesh.

The post Debati për reformën në drejtësi/ Lubonja: Vettingu u bë në mënyrë selektive nga grupe të lidhura me maxhorancën appeared first on 55 News.

Vettingu, konfirmohet në detyrë kryeprokurorja e Durrësit, kandidate për SPAK

Koz Dynjaja — Tue, 10 Dec 2019 11:03:09 +0000

Konfirmohet në detyrë prokurorja Anita Jella. Komisioni i Pavarur i Kualifikimit me trupë gjyqësore Xhensila Pine, Etleva Çiftja dhe Valbona Sanxhaktari ka konfirmuar në detyrë drejtuesen e Prokurorisë së Durrësit, e cila është njëherazi edhe kandidate për Prokurorinë e Posaçme kundër Korrupsionit dhe Krimit të Organizuar.

Anita Jella ka përfunduar studimet në Fakultetin e Drejtësisë në vitin 1999 dhe Shkollën e Magjistraturës në vitin 2002. Ajo e ka filluar karrierën si prokurore në Elbasan në vitet 2001-2003 dhe më pas ka punuar si drejtuese e Prokurorisë së Librazhdit deri në vitin 2007.

Pas rikthimit për një vit në Prokurorinë e Elbasanit, Jella u emërua prokurore në Prokurorinë e Durrësit, ku e ushtron funksionin prej 10 vitesh. Më 9 maj 2018, Anita Jella u caktua përkohësisht drejtuese e Prokurorisë së Durrësit.

The post Vettingu, konfirmohet në detyrë kryeprokurorja e Durrësit, kandidate për SPAK appeared first on 55 News.

Standardet e dyfishta të Vettingut dhe Ramaforma

Koz Dynjaja — Fri, 22 Nov 2019 08:42:10 +0000

Dje Komisioni i Pavarur i Apelimit rrëzoi gjyqtarin Besnik Muçi, i cili dy muaj më parë ishte emëruar dhe dekretuar nga Presidentit si anëtar i kësaj gjykate. Procesi i vetingut ndaj tij u mbyll në tetor 2018 pa asnjë vërejtje dhe u la të vazhdojë karrierën. Ndërkohë, pasi kandidoi për Gjykatën Kushtetuese dhe u përzgjodh si emër nga presidenti, mekanizmat e Vettingut u rivunë në lëvizje dhe dje e hoqën nga sistemi për 6 milionë lekë të vjetra të pa justifikuara. Pa dashur të bëjmë avokatin e Besnik Muçit në këtë proces, me shumë se emrat ka rëndësi standardi. Vendimi i djeshëm ndaj tij ngre pikëpyetje mbi mënyrën sesi po funksionon gjithë procesi i reformës. Shuma 6 milionë lekë (të vjetra) mund të jetë e madhe për Komisionin e Apelimit, ndërkohë rreth 100 milionë që nuk u justifikonte kreu i KED u kaluan si një gabim normal. Nga ana tjetër, ka gjyqtarë dhe prokurorë që inspektorët e vettingut u kanë numëruar edhe brekët, ndërsa për të tjerë që kanë zënë poste kyç në institucionet e reja të drejtësisë, inspektorët e Vetting kanë qenë aq qorra sa nuk shihnin vilat në bregdet, apartamentet në Tiranë. Kushdo që ka pasuri të pajustifikuar dhe ka abuzuar me detyrën duhet të largohet, por vendimet me sy standarde nuk tregojnë gjë tjetër vetëm se kontroll politik të sistemit. Në rastin e Besnik Muçit ka dhe një pikëpyetje të madhe që vë ne dyshim gjithë procesi. A mos vallë ata që kontrollojnë vettingun, qëllimisht lënë ndonjë kleçkë në proces, që në një moment të dytë të përdoret edhe si shantazh, kur nuk u binden urdhrave të partisë? Sepse për 6 milionë lekë të vjetra të pa deklaruara, asnjë nga 800 prokurorët dhe gjyqtarët që ka Shqipëria nuk e kalon vettingun. Akti i djeshëm ndaj Besnik Muçit përveç se po përdoret dhe si një argument kundër Presidentit, i cili në fakt zgjodhi nga lista që i solli KED, ka dhe një efekt tjetër afatgjatë. Me vendimin ndaj tij, organet e Vettingut e shkatërruan edhe njëherë Gjykatën Kushtetuese.

Tashmë debati nuk është më vetëm te çështja e gjyqtares që doli nga lista e manipuluar e KED, por dhe të një tjetër anëtar. Në këtë mënyrë, nga ngritja me urgjencë e Gjykatës Kushtetuese kemi arritur në shtyrjen pa fund të afatit për vënien e saj në punë. Për të kuptuar se kush ka të drejtë, qeveria apo presidenti në këtë debat, mjafton të kuptojmë se kujt i intereson që vendi të mos ketë Gjykatë Kushtetuese. Presidenti është i pari që ka kërkuar ngritjen e saj. Ka dokumente që i janë drejtuar KED që në ditën e parë të formimit për të sjellë listat. Ndërkohë qeverisë dhe Rilindjes i intereson ta shtyjë sa më gjatë. Sepse një gjykatë kushtetuese jo funksionale i zgjat jetën qeverisë “Rama” dhe gjithë paligjshmëve. I vetmi që përfiton nga mos ngritja e Gjykatës Kushtetuese është Edi Rama, pasi krimet qeverisëse si koncesionet, votimet moniste dhe paligjshmëria e parlamentit me 122 mandate nuk shqetësohen. Ky kaos total kushtetues, ligjor dhe politik është si mjergull që i jep qeverisë “leje” të bëjë ç’të dojë në këtë vend. Edhe në kohën që opinioni përplaset për Dvoranin, Voprsin dhe ligjet, vjedhjet qeveritare vijojnë njëlloj, në mos edhe me ritëm më të madh. Kur sheh produktin që ka sjellë deri së sot ky proces duket se nuk flitet për reformë, por për Ramaformë, pasi çdo lëvizje i ka shërbyer qeverisë. Në këtë kaos duket se e kanë humbur orientimin dhe një pjesë e ndërkombëtarëve. Duke qenë se Reforma në Drejtësi është investimi i tyre më i madh nuk mund të pranojnë faktin se një pjesë e saj ka dështuar dhe është kapur nga qeveria. Kanë arritur në pikën që edhe ligjet që ua sollën vet shqiptarëve për t’i miratuar nuk i zbatojnë dhe nuk i njohin më. Për këtë qëllim, kërkojnë vetëm që gjykatat të ngrihen me shpejtësi, pa marrë parasysh cilësinë e njerëzve që po hyjnë në poste kyçe dhe kontrollin që qeveria ka mbi ata. Kjo është një zgjidhje provizore që mund të justifikojë fondet që ambasadat kanë dhënë për reformën, por do të prodhojë një drejtësi edhe më të keqe. Sepse njerëzit që po emërohen politikisht po vijnë si ushtarë të Rilindjes brenda drejtësisë. Këta që sot duken si njerëz anonim dhe gënjejnë opinionin si i mbështesin ndërkombëtarët, nesër nuk e kanë problem të legjitimojnë një regjim të rrezikshëm politik.

Ndaj vrapi i disa ndërkombëtarëve për të mbështetur çdo propozim që po japin njerëzit e Rilindjes për të kapur reformën, mund të jetë një sukses momental në karrierat e tyre, por për shqiptarët mund të kthehet në dështimin më të madh. Sepse kapja e reformës, siç ka nisur nga Edi Rama, nuk do të prodhojë drejtësi, por kaos në gjithë shoqërinë.

Mili Xhani

The post Standardet e dyfishta të Vettingut dhe Ramaforma appeared first on 55 News.

Vetëplagoset me armë gjahu/ Humb jetën 49-vjeçari në Tiranë

Koz Dynjaja — Thu, 26 Sep 2019 15:27:49 +0000

Një 49-vjeçar është vetëplagosur ditën e sotme me armë gjahu.

Ai është dërguar me urgjencë në spital, por nuk ka mundur ti mbijetojë plagëve të marra.

Ende nuk dihen arsyet e ngjarjes së rëndë, ndërsa policia ka nisur menjëherë hetimet.

Njoftimi i Policisë Tiranë:

Rreth orës 14:50, në rrugën “Skënder Jareci”, dyshohet se si pasojë e depresionit është vetëplagosur në banesë me armë gjahu shtetasi A. B., 49 vjeç, i cili u dërgua në spital për ndihmë mjekësore.

Si pasojë e plagëve të marra,shtetasi A. B ka ndërruar jetë në spital.

Grupi hetimor po vijon punën për sqarimin e mëtejshëm të rrethanave të ngjarjes.

The post Vetëplagoset me armë gjahu/ Humb jetën 49-vjeçari në Tiranë appeared first on 55 News.

‘Vetingu’ toleroi transaksionet e prokurorit Klodian Braho me kunatin e arrestuar për drogë

Koz Dynjaja — Thu, 12 Sep 2019 11:41:31 +0000

Nga Boldnews.al

Komisioni i Pavarur i Kualifikimit (KPK) ka ‘mbyllur sytë’ para disa transaksioneve që bashkëshortja e prokurorit të Krimeve të Rënda, Klodian Braho, ka kryer me vëllain e saj, E.V, i arrestuar dhe dënuar në Itali për trafik droge.

KPK konfirmoi në detyrë subjektin Braho, aktualisht zv.drejtues i Prokurorisë për Krime të Rënda, me votat e anëtarëve Valbona Sanxhakari dhe Roland Ilia. Ndërkohë që kryesuesja e trupës gjykuese të Vetingut, Xhensila Pine, ka qenë kundër për shkak të problemeve me kriterin e figurës.

Komisionerja Pine ka shpjeguar me detaje se përse ajo është kundër konfirmimit të prokurorit Klodian Braho, në dokumentin ‘mendim pakice’, i cili shoqëron vendimin nr. 191, dt. 26.07.2019.

Prokurori Braho është aktualisht pjesë e 15 kandidatëve të miratuar nga Këshilli i Lartë i Prokurorisë për të qenë pjesë e Strukturës së Posaçme Antikorrupsion (SPAK).

Kundërshtimet e Pines

Komisionerja Xhensila Pine është ndalur gjatë në rastin e arrestimit dhe dënimit të kunatit të Klodian Brahos, për të cilin prokurori ka deklaruar në formularët e integritetit se nuk ka pasur dijeni.

Shumica e trupës së KPK-së, ‘bazuar në shpjegimet e subjektit dhe në hetimin e kryer për këtë çështje, krijoi bindjen se subjekti nuk ka pasur kontakte të vazhdueshme me shtetasin E.V. Kjo rrethanë e kontakteve të rralla familjare, se subjekti i rivlerësimit nuk ka qenë në dijeni për arrestimin e kunatit E.V., u mor në konsideratë nga Komisioni si rrethanë lehtësuese në përputhje me pikën 5, të nenit 38, të ligjit nr. 84/2016’.

Por, për të njëjtat rrethana, kryesuesja e trupës gjykuese, Xhensila Pine, ka mendim tërësisht të kundërt.

Në zyrat e Komisionit të Pavarur të Kualifikimit ka mbërritur një denoncim publik, sipas të cilit, kunati i subjektit Klodian Braho është arrestuar dhe proceduar për shitje lëndësh narkotike në Itali.

Në vitin 2011 një nga anëtarët e familjes së tij, konkretisht shtetasi E.V., vëllai i bashkëshortes, i cili përfshihet te ‘krushqia deri në shkallë të dytë’, dhe që konsiderohet anëtar familjeje, rezultoi se ishte arrestuar dhe proceduar penalisht për shitje të lëndëve narkotike në shtetin italian.

Media italiane ka raportuar për arrestimin e shtetasit Ergus Veraj, kunati i prokurorit Klodian Braho, për shitje narkotikësh

‘Sipas parashikimit të pikës 15, të nenit 3, të ligjit nr. 84/2016, shtetasi E.V., konsiderohet person i përfshirë në krimin e organizuar dhe subjekti kishte për pasojë detyrimin ta deklaronte këtë fakt në deklaratën për kontrollin e figurës në pjesën 5 të saj, te rubrika e të dhënave për sigurinë’, argumenton Pine.

Sipas komisioneres, subjekti i rivlerësimit, z. Klodian Braho, përpara se të plotësonte deklaratën për kontrollin e figurës duhet të bënte të gjitha verifikimet e nevojshme me qëllim plotësimin me vërtetësi dhe saktësi sipas detyrimit kushtetues, të deklaratës për kontrollin e figurës, ndër të tjera edhe pjesës 5, të saj.

Pasi u pyet nga Komisioni në rezultate hetimi, subjekti i rivlerësimit, z. Klodian Braho, pranoi faktin se z. E.V., është proceduar penalisht në shtetin italian, dhe deklaroi se nuk ishte në dijeni të dënimit që vëllai i bashkëshortes së tij kishte në shtetin italian.

Aplikimi i parashikimeve të germës ‘b’, të pikës 5, të nenit 38, të ligjit nr. 84/2016, për rrethana lehtësuese do të ishte i mundur vetëm nëse:

1. shkalla e ndikimit apo afërsia e subjektit me kontaktin do të ishte e largët;

2. do të kishte deklarime të vërteta dhe të plota, në lidhje me këtë kontakt.

Ndryshe nga sa ka arsyetuar shumica, ‘kam vlerësuar se subjekti i rivlerësimit nuk gjendet në kushtet e aplikimit të parashikimeve të germës ‘b’, të pikës 5, të nenit 38, të ligjit nr. 84/2016, për rrethana lehtësuese’, shprehet Xhensila Pine,

Ajo argumenton qëndrimin e saj: për sa më poshtë vijon: ‘Afërsia e subjektit me kontaktin e papërshtatshëm, u provua jo vetëm gjatë hetimit administrativ, por edhe shpjegimeve të subjektit, konfirmuar edhe me deklaratën noteriale të sjellë prej tij ku referohen komunikime të bashkëshortes me të vëllanë. Subjekti nuk dha deklarime bindëse e të plota në lidhje me këtë kontakt, për të vërtetuar se marrëdhëniet midis tij dhe shtetasit E.V., janë të largëta dhe të rralla’.

Kjo afërsi,- shprehet komisionerja në pakicë- si dhe shkalla e ndikimit, u konfirmuan edhe nga fakti që për kreditë e marra nga bashkëshortja e tij si bashkëkredimarrëse, këstet mujore paguheshin dhe vijojnë të paguhen, edhe aktualisht ndër të tjera, edhe nga të ardhurat e shtetasit E.V.

‘Pagesa e kësteve për kreditë e marra nga bashkëshortja e subjektit si bashkëkredimarrëse, nga shtetasi E.V., e vendos subjektin e rivlerësimit në parashikimet e pikës 5, germa ‘f’ të shtojcës 3, të ligjit nr. 84/2016, në kushtet e mosdeklarimit të kontaktit me të cilin ka shkëmbyer pasuri një person i lidhur me të sipas ligjit nr/84/2016’, konstaton Komisionerja e Vetingut.

Pasi u pyet nga Komisioni, subjekti nuk përmendi në parashtresën e tij ‘asnjë shpjegim për llojin apo numrin e dënimeve të marra nga kunati i tij në shtetin italian, kohën e arrestimit dhe procedimit penalisht, apo të marrjes së këtyre dënimeve, duke mos qenë i hapur dhe i plotë në deklarimet e tij lidhur me arrestimin e shtetasit E.V., vëllai i bashkëshortes’, vijon Pine.

Ndryshe nga sa ka pretenduar subjekti, komisionerja e pakicës ka vlerësuar se subjekti Klodian Braho, nuk gjendet as në kushtet e aplikimit të parashikimeve të germës ‘d’, të pikës 7, të nenit 38, të ligjit nr. 84/2016, pasi ai nuk ka provuar bindshëm se s’ka qenë në dijeni të faktit se vëllai i bashkëshortes së tij, shtetasi E. V., është i përfshirë në krimin e organizuar.

Siç konstaton komisionerja e pakicës, në shpjegimet e sjella nga subjekti para Komisionit për të ardhurat e dy vëllezërve të bashkëshortes, me të cilat paguhet edhe aktualisht kredia e marrë nga bashkëshortja dhe nga babai i saj, ‘për shtetasin E.V., subjekti i rivlerësimit nuk i paraqiti Komisionit asnjë dokumentacion për punësimin dhe të ardhurat e tij në shtetin italian, ndryshe nga sa për vëllain tjetër të bashkëshortes paraqiti dokumentacion të plotë për të ardhurat në shtetin italian’.

Këtë shmangie të shpjegimeve mbi të ardhurat e shtetasit E.V. në Itali dhe deklarimin vetëm të të ardhurave të tij në Shqipëri, (rezultoi sipas sistemit TIMS se shtetasi E.V., ka qëndruar në Shqipëri për periudha shumë të shkurtra), komisionerja Xhensila Pine e ka vlerësuar si indice e dijenisë së subjektit lidhur me procedimin penal për shtetasin E. V., në shtetin italian.

Duke marrë në konsideratë arsyetimin e mësipërm, komisionerja Pine ka arritur në konkluzionin se ‘subjekti i rivlerësimit ka plotësuar në mënyrë të pasaktë dhe jo me vërtetësi deklaratën për kontrollin e figurës, dhe ngarkohet me përgjegjësinë e mosplotësimit të saktë, pasi nuk ka deklaruar faktin se vëllai i bashkëshortes së tij ka qenë i proceduar penalisht për veprën penale të shitjes së lëndëve narkotike në shtetin italian, as shkembimin e pasurisë me persona të përfshirë në krimin e organizuar’.

Po ashtu, komisionerja e pakicës konstaton se ‘Subjekti i rivlerësimit nuk provon bindshëm se s’ka qenë në dijeni të faktit se vëllai i bashkëshortes së tij, shtetasi E.V., ka qenë i proceduar penalisht në shtetin italian dhe me argumentet e dhënë në drejtim të shfajësimit apo të padijenisë, nuk provoi me motive apo argumente, zhveshjen nga kjo përgjegjësi’.

Në konkluzion të analizës së saj, komisionerja Xhensila Pine ka votuar për shkarkimin e subjektit të rivlerësimit, z. Klodian Braho, me detyrë prokuror pranë Prokurorisë së Krimeve të Rënda Tiranë.

Qëndrimi i saj nuk është mbështetur nga dy kolegët e tjerë të trupës së Komisionit të Pavarur të Kualifikimit, të cilës, me shumicë votash, kanë vendosur konfirmimin në detyrë të prokurorit Klodian Braho.

The post ‘Vetingu’ toleroi transaksionet e prokurorit Klodian Braho me kunatin e arrestuar për drogë appeared first on 55 News.

Që Vettingu mos të na kujtojë “Plepat”!

Koz Dynjaja — Thu, 23 May 2019 12:05:36 +0000

Ermal Mulosmani

Kryeministri Rama, në një përgjigje në rrjetet sociale ndaj deklaratave të mëhershme të Presidentit Ilir Meta, e quajti mungesën e Gjykatës Kushtetuese një gjë më të mirë sesa ekzistencën e saj.

“Më mirë bosh nga Vetingu sesa me djallin brenda”, kjo ishte shprehja e Kryeministrit.

Po të ndjekim të njëjtën logjikë, zoti Kryeministër, duhet ta heqim fare sistemin e Drejtësisë. Nëse Vetingu do të jetë rigoroz sa në rastin e Antoneta Sevdarit, nuk do mbetet as gjykatës e as prokuror në këmbë. Shqipëria ka jetuar me ekonomi informale në një periudhë të gjatë kohe. Është shteti i dalë më së voni nga sistemi komunist dhe një nga shtetet më të varfëra të Evropës.

Gjyqtarët dhe Prokurorët e Shqipërisë duhen parë si pjesë e këtij realiteti. Nuk mundet të përdorim fjala vjen të njëjtat standarte që përdorim për gjykatësit suedezë apo finlandezë.

Një pjesë e madhe e tyre (gjykatësve, prokurorëve) vijnë nga të famshmit “Plepa”. Plepat, për ata që nuk e kanë idenë se nga vjen kjo fjalë, është një vend në Durrës, në breg të detit, ku u vendos që të shkolloheshin “juristët e së ardhmes” me kurse tre apo 6 mujore. Ishte koha kur po ndërroheshin sistemet dhe ishte krijuar boshllëk i madh. Si tani por për arsye të ndryshme. Partia në pushtet, në ato kohë, formoi juristët e vet, besnikët e Partisë. Mblodhi nga gjithë Shqipëria dhe siç kishte kurse për shoferë, tornitorë apo mekanikë u krijuan edhe kurset për gjyqtarë!

Siç i bëri edhe Partia e parë gjyqtarë kovaçët partizanë të sapo dalë nga Lufta. Të paaftë profesionalisht dhe lehtësisht të korruptueshëm, këta ishin batakçinjtë më të mëdhenj.

Në vend që të vinim vetullat nxorëm edhe sytë.

Tani jemi në të njëjtat kushte. Vetingu po i hedh në tokë gjykatësit, prokurorët. Në një raport të publikuar së fundmi, Komisioni i Pavarur i Kualifikimit (KPK) raporton që nga 108 raste të kaluara ka shkarkuar 52! Po t’u shtojmë këtyre edhe rastet e shkarkuara nga Komisioni i Apelimit (KPA) si edhe numrin e atyre që janë tërhequr me vullnetin e tyre nga sistemi, atëherë, numri rritet ndjeshëm.

Në sistemin e Drejtësisë, të kulluarit, ata që kalojnë vrimën e gjilpërës së KPA dhe KPK do të jetë shumë më i vogël sesa ata që do mbeten jashtë…

Po ku do i gjejmë zëvendësuesit për këta që u shkarkuan?

Ligji parashikon vetëm një mundësi, Shkollën e Magjistraturës. Edhe kjo shkollë u vendos në një vend piktoresk, mes pemëve e gjelbërimit të Liqenit Artificial të Tiranës . Por kjo ishte e vetmja gjë e përbashkët me “Plepat” famëkeq. Magjistratura është me kohëzgjatje të plotë e kritere të rrepta.

Numri i magjistratëve në vit të tretë është 25 sipas faqes së kësaj shkolle. Në vit të dytë janë 15 e në vit të parë akoma më pak, vetëm 10 vetë. Pra, me këtë ritëm, pas tre vitesh i bëjmë vetëm 50 vetë…

Edhe sa vjet duhet të presim ne për të pasë Gjykatë Kushtetuese, Gjykatë të Lartë, plotësimin e vendeve të pafund bosh në Gjykata të nivelit të dytë e të parë, në Prokuroritë e të gjitha shkallëve?

Apo “më mirë bosh sesa me djallin brenda”?!

Sistemi duket në kolaps. Reforma në Drejtësi nuk duhej të kolapsonte kurrsesi sistemin, presupozohej që të ishte çlirimi i tij nga të padenjët. Kush përfiton nga mungesa e drejtësisë në një vend me kriminalitet dhe korrupsion të lartë? Sa është numri i dosjeve që akumulohen çdo ditë e më shumë në sirtaret e arkivat e Gjykatës së Lartë dhe kush e paguan këtë kosto? A quhet shtet një i tillë kur i mungon elementi gjyqësor në nivele kaq të larta? A e din zoti Kryeministër që për të bërë një ekstradim të një krimineli me damkë, të shumëkërkuar, duhet një vendim i Gjykatës së Lartë? Dhe nëse kjo Gjykatë u shua do të thotë që jemi në parajsën e kriminelëve më të famshëm shqiptarë që janë jashtë terrritorit shqiptar?!

Apo “më mirë bosh se me djallin brenda”

Që mos të shkojmë as në Plepa e as “të rrimë bosh më mirë sesa me djallin” është një zgjidhje. Të mbajmë në sistem më të mirët e atyre që kemi duke ruajtur institucionet kryesore. Pra, të heqim më të këqinjtë për aq sa kemi mundësi të zëvendësojmë. Vitin e parë të heqim 25 më të korruptuarit, vitin e dytë 15 e kështu me radhë.

Apo t’i marrim oficerët e policisë gjyqësore dhe ndihmës gjyqtarët e ti bëjmë prokurorë e gjyqtarë?!

Mu kujtuan qershitë e Nastradinit…

The post Që Vettingu mos të na kujtojë “Plepat”! appeared first on 55 News.

Lleshaj, ky “shkop gome” i verbër

Koz Dynjaja — Mon, 06 May 2019 12:36:36 +0000

Sot, Komisioni i Sigurisë, me votat e mazhorancës, ka rrëzuar dekretin e presidentit Ilir Meta për Vettingun e Policisë. Meta kishte kërkuar rishikimin e ligjit për vettingun në Policinë e Shtetit, duke e cilësuar atë si rrezik dhe mundësi për t’u ndikuar nga ana e qeverisë. Por ka qenë vetë ministri Lleshaj, i ftuar për të raportuar në komision, që e cilësoi si paragjykim i presidentit Meta ndaj dikasterit që ai drejton, madje përdori edhe termin “paranojak” për presidentin duke lënë të kuptohej, se ai e ka “personale” me atë. “Gjenerali” Lleshaj, i mësuar me jetën e kapanoneve të ushtirsë, nuk u ngrit dot në nivelin e një ministri, drejtuesi poltik, por mbeti si një thashethemexhi kapanonesh, duke aluduar se shteti funksionin në bazë njohjesh e inatesh personale. Në vend që të analizojë dekretin e presidentit, qoftë edhe me këshillimet e juristëve apo të personave që i rrinë pranë, Lleshaj merr pësipër që gjithçka ta zgjidhi personalisht, madje t’u mbushë mendjen edhe deputetëve se “kjo është çështje perosnale” mes tij dhe presidentit, jo një gjë thelbësore, pasi argumenti i Presidfnetit është i qartë, se vettingu nga vetë policia është politik, absurd dhe i rrezikshëm.

Sipas ministrit, “vetingun në polici i takon ta bëjë SHÇBA. Vetingu nuk është politik. Çdo hyrje ne policinë e shtetit do të futet ne vetting nga SHÇBA. Dhe ky institucion do ta bej përherë vettingun dhe është absurd të mos e bëjë. E ka me ligje që ta bëjë përherë”, ka deklaruar mes të tjerave Lleshaj. Po kush e ka ndaluar më parë këtë institucion, SHÇBA, të ngritur nga vetë ministria e Brendshme të bëjë vettingun e personave në polici? Si ka mundësi që në radhët e policisë ka edhe elemente të përfshira mekrimin e trafiqet? Si ka mundësi që tani kur kërkohet ky ventting, po si pas vetë ministrit, qenkan jo pak po 200 – 300 vetë që duhet të lenë policinë?!

Ministri Lleshaj e dëshmoi edhe një herë varësinë e tij politike, sidomos nga Rama, që nuk është gjë tjetër vecse një “shkop gome” I verbër në duart e kryeministrit, që nuk di gjë tjetër vetëm të përdorë dhunën ndaj njerëzve të pafajshëm, ndaj protestuese paqësorë, të përdorë gazin dhe shkopinjtë, të përdorë forcën fizike dhe jo fjalën, argumentin. /55news.al

The post Lleshaj, ky “shkop gome” i verbër appeared first on 55 News.

Bylykbashi: Rama nuk heq dorë nga marrëdhënia me krimin e organizuar, sepse mbron pushtetin e tij

Koz Dynjaja — Sun, 23 Dec 2018 12:42:12 +0000

Deputeti demokrat Oert Bylykbashi ka shpjeguar arsyet se përse Edi Rama nuk e do vetingun e politikanëve. Bylykbashi thotë se Ramës, kriminelët i duhen për të mbledhur vota me para dhe presion. “Po njësoj Rama refuzoi edhe Dekriminalizimin në vitin 2015”, shkruan Bylykbashi, i cili përmendi rastin e Elvis Roshit që sipas Ramës “përdhunimi në grup është gabim rinie”.

Bylykbashi ka publikuar edhe një video ku Edi Ramës i jep përgjigje zv.kryeministri Italian Di Maio, i cili më herët kishte refuzuar kandidatin e tij që doli në foto me një mafioz.

Deklarimi i plotë i Bylykbashit.

Ja perse Edi Rama nuk e do vetingun e politikaneve. Atij kriminelet i duhen per te mbledhur votat me para dhe presion. Ja perse me 74 votat e tij ne parlament refuzoi asistencen dhe Udhezuesin e Komisionit te Venecias se si duhet bere vetingu i politikaneve te lidhur me krimin.

Ja perse Edi Rama perdor Kushtetuten si alibi per mbrojtjen qe i ben ketyre politikaneve. Po njesoj, Edi Rama refuzonte Dekriminalizimin para zgjedhjeve lokale te 2015 duke mbrojtur Elvis Rroshin se perdhunimi ne grup kishte qene vetem nje “gabim rinie”.

Sot, serish para zgjedhjeve, marredhenien me krimin perpiqet ta normalizoje, ta thjeshtoje dhe e quan “marredhenie me elektoratin”. Shihni si, ne fund te videos, Edi Rames i jep pergjigje Di Maio, Zevendeskryeministri i Italise dhe lider i “Movimento 5 Stelle” qe dy jave me pare refuzoi kandidatin e tij qe doli ne foto me nje mafioz:

“Ne votat e tyre nuk i duam, na e shpifin!” Sa per kujtese, sot mbushen 4 vite nga marreveshja per Dekriminalizimin e 23 dhjetorit 2014, qe Parlamenti Europian i imponoi Edi Rames. Kater vite me pas, Edi Rama nuk heq dore nga marredhenia me krimin e organizuar sepse keshtu mbron pushtetin e tij.

The post Bylykbashi: Rama nuk heq dorë nga marrëdhënia me krimin e organizuar, sepse mbron pushtetin e tij appeared first on 55 News.

Ishte në listën e Vettingut, jep dorëheqjen ish-kreu i Gjykatës së Apelit, Tiranë

Koz Dynjaja — Sun, 02 Dec 2018 10:58:41 +0000

Dorëheqja e ish-kreut të Gjykatës së Apelit Tiranë, Metush Saraçi është bërë në fillim të muajit nëntor dhe i është depozituar KLD-së dhe Komisionit të Pavarur të Kualifikimit. Jo zyrtarisht nga KPK, flitet se Saraçi ka probleme me pasurinë dhe karrierën e tij në sistemin e drejtësise.

Ish-kreu i Gjykatës së Apelit, Metush Saraci ka dhënë dorëheqjen, në një moment kur ishte në listën e gjyqtarëve të cilët do t’i nënshtroheshin Vettingut. Report Tv ka mësuar se dorëheqja e Saraçit është bërë në fillim të muajit nëntor dhe i është depozituar KLD-së dhe Komisionit të Pavarur të Kualifikimit. Metush Saraçi ka mbajtur postin e kreut të Gjykatës së Apelit deri në 2011. Pas mbarimit të mandatit, ai u zëvendësua nga Alaudin Malaj. Nga burime pranë KLD-së, Report Tv ka mësuar gjithashtu se Saraçi e ka dhënë dorëheqjen duke e argumentuar me arsye personale. Jo zyrtarisht nga KPK, flitet se ai ka probleme me pasurinë dhe karrierën e tij në sistemin e drejtësisë. Sa i takon Komisionit të Vettingut, pas listës prioritare të kandidatëve për Këshillin e Lartë të Prokurorisë dhe atë Gjyqësor, do të kalojë në sitë gjyqtarët e apeleve duke nisur nga Tirana.

The post Ishte në listën e Vettingut, jep dorëheqjen ish-kreu i Gjykatës së Apelit, Tiranë appeared first on 55 News.

Washington Times: Vettingu i mbështetur nga Donald Lu kishte qëllim vendosjen e njerëzve të Sorosit në gjykata

Koz Dynjaja — Sat, 17 Nov 2018 12:50:24 +0000

Nga L. Todd Wood

Ambasadori Donald Lu ka një histori të gjatë e polarizuese në Shqipëri. Gjatë tre viteve si i dërguari i SHBA në Tiranë, ai promovoi aktivisht një axhendë anti-korrupsion për të cilën shumë kritikë thonë se u shndërrua në sulm kundër partive dhe politikanëve konservativë shqiptarë, duke përkrahur fort të ashtuquajturën “reformë në drejtësi”.

Ai punoi me qeverinë socialiste të kryeministrit Edi Rama, një qeveri e përkrahur fuqishëm nga miliarderi filantrop e investues amerikan George Soros. Rezultati i fushatës: një kolaps i plotë i qeverisjes kushtetuese në vendin ballkanik. Reformat që përkrahu zoti Lu kanë çuar në një “proces vettingu” për të garantuar vendosjen e gjyqtarëve të pakorruptuar në gjykata. Në teori tingëllon bukur, por pasojat kanë qenë krejt ndryshe në botën reale. Aktualisht në Shqipëri nuk ka gjykatë kushtetuese aktive për shkak të mungesës së kuorumit dhe nuk pritet që gjykata të funksionojë në të ardhmen e afërt.

E gjithë kjo ishte pjesë e një plani, sigurisht – instalimi i njerëzve pro-Soros në pushtet dhe pastaj bërjen të pamundur për opozitiën që t’i sfidonte në gjyq. Ngjason frikshëm me ato koret “Anuloni ICE” dhe “Numëroni të gjitha votat, edhe ato të paligjshme” që votuesit amerikanë dëgjuan në zgjedhjet e fundit ndërsezonale. Me opozitën dhe gjykatat të neutralizuara, politikanët shqiptarë kanë lejuar me shumë kënaqësi oligarkët të bëjnë pasuri falë kontratave me qeverinë. Me një qeveri pro-Soros në fuqi vijnë edhe projektet e parapëlqyera nga Soros, përfshirë legalizimin e drogës, promovimi agresiv i të drejtave të homoseksualëve dhe kufijtë e hapur.

Shqipëria ishte thjesht një fushë testimi për axhendën e Sorosit. Tani pjesa tjetër e Ballkanit dhe Azia Qendrore mund të shijojnë së shpejti kënaqësinë e llojit të veçantë sorosian të globalizmit të detyruar liberal. Alex Soros, djali i perandorit, ka udhëtuar nga njëri kryeqytet ballkanik në tjetrin, duke takuar krerë shtetesh për të përhapur lajmin e mirë e për të promovuar vetitë e politikave liberale të imigracionit.

Në Kosovë, një “shkëmbim territoresh” i përkrahur nga Soros mund të çojë në dhunë serioze etnike midis shqiptarëve dhe komuniteteve serbe (edhe kancelarja gjermane Angela Merkel është kundër idesë). Gjëja e trishtueshme është që administrata Trump, e trazuar nga ngjarjet e brendshme dhe krizat ndërkombëtare, duket se përmes neglizhencës së saj ia ka deleguar diplomacinë dhe politikën ballkanike dyshes babë e bir Soros. Tani vjen lajmi alarmues që zoti Lu, pasi promovoi axhendën e Sorosit në Tiranë, është konfirmuar nga Senati dhe instaluar si ambasadori amerikan në Kirgizstan. Është sërish e sikletshme që administrata Trump duket e pavetëdijshjme për pasojat e zgjedhjeve të veta diplomatike.

Përfituese është axhenda e Sorosit për rajonin, e cila ka si objektiv vende të pastabilizuara që ende përpiqen të krijojnë qeverisje të qëndrueshme. Është e mirëdokumentuar se si Departamenti i Shteti në Shqipëri e ka kundërshtuar hapur axhendën e Presidentit Trump “Amerika e para”, deri në atë pikë sa ka shpallur “rezistencën” dhe punon me qeverinë e Ramës për axhendën shumë të dyshimtë të “reformës në drejtësi”. Shqipëria nuk është tamam një prioritet i politikës së jashtme dhe zyrtarë të Shtëpisë së Bardhë më kanë thënë në konfidencë se këto çështje kalojnë pa iu kushtuar shumë vëmendje për shkak të instabilitetit dhe zjarreve më të mëdhenj me të cilët duhen të merren çdo ditë.

Por vendimet e personelit duhet të kenë vëmendje të veçantë, teksa njerëzit e erës Obama në . But personnel decisions should be a particular area of concern, as Obama-era holdovers at DSH punojnë në heshtje për të shkatërruar axhendën MAGA (Ta bëjmë Amerikën përsëri të madhe). Sekretari i Shtetit Mike Pompeo “po kalon kohë të vështira. Departamenti i Shtetit është një kënetë e madhe”, më thanë. Mos më besoni mua për pasojat politike të lënies së diplomatëve si Donald Lu në detyrë, thjesht shihni sitin e Open Society të zotit Soros. Zoti Lu lëvdohet si një “ambasador i ri që ofron shansin për ta nisur nga a para”.

Jam i bindur që Kryeministri Rama loboi fort që Lu të merrte postin në Kirgizstan. Amerika duhet të vendosë rregull në trupin e saj diplomatik. Zyrtarët e Shërbimit të Jashtëm i shërbejnë Presidentit të Shteteve të Bashkuara, jo përparësive të tyre. Është koha që ta kuptojnë këtë. Nëse jo, duhet të kenë mirësinë të japin dorëheqjen.

* L. Todd Wood është ish-pilot helikopteri i operacioneve special dhe negociues borxhesh në Wall Street. Ai ka kontribuar për Fox Business, The Moscow Times, National Review, The New York Post dhumë shumë publikime të tjera.

The post Washington Times: Vettingu i mbështetur nga Donald Lu kishte qëllim vendosjen e njerëzve të Sorosit në gjykata appeared first on 55 News.