Rreth 341 pallate në kryeqytet janë braktisur nga ndërtuesit, duke i lënë edhe qytetarët në “mëshirë të fatit” dhe zyrtarisht jo pronarë të apartamenteve për të cilat kanë paguar.
Drejtori i Përgjithshëm i ALUIZNI-t, Artan Lame ka bërë publike subjektet e përfshira në listën e zezë vetëm në kryeqytet, ndërsa ka bërë me dije masat e marra, ku u është kërkuar bashkive që të mos japin leje të reja për këto ndërtues pa mbyllur legalizimin e pallateve të ndërtuara deri më tani si dhe do t’iu bllokohen llogaritë bankare.
Nëse ndërtuesit nuk përgjigjen, atëherë qytetarët që përballen me këtë problematikë duhet të bashkohen në një përfaqësi dhe t’i drejtohen ALUIZNI-t.
Procesi do të fillojë më kryeqytetin, ku dhe problematika është me e madhe, ndërsa numri i subjekteve shkelëse shkallë vendi është shumë më i lartë.
