Shkarkohet gjyqtari Artam Broci, ky ka qenë vendimi i dhënë sot në Komisionin e Pavarur të Kualifikimit. Broci ishte gjyqtar pranë Gjykatës së Lartë, e cila po shkon drejt kolapsit, njësoj si Gjykata Kushtetuese që nuk plotëson kuorumin për t’u mbledhur.
Pasuria e tij ka qenë një nga pikat më të diskutueshme, ku sipas KPK-së, ”Broci ka mospërputhje mes deklarimeve dhe informacionit mbi blerjen e tokës, të cilën më pas e ka shitur në 2010, nuk ka pasur të ardhura për ta blerë shtëpi në vitin 2006 në të cilën nuk ka deklaruar shtesën e bërë, ka mospërputhje mes lëvizjeve në llogari bankare dhe kontratës së shitjes, gjithashtu Broci nuk ka paguar tatimin për shitjen e këtij apartamenti”.
Ndërkohë që vetë gjyqtari është justifikuar duke thënë se pretendimet nuk ekzistojnë dhe se ai vetë ka qenë bashkëpunues, duke paraqitur 58 faqe material.
‘’Ju kam dhënë 58 faqe material. Janë 250 prova të reja. Sa i përket apartamenteve, kam ndërtuar në Don Bosko një shtesë anësore duke paraqitur edhe kontratën me subjektin e ndërtimit jo vetëm për vete plot edhe të fqinjit tim. Këto pretendime nuk qëndrojnë.
Një objekt e kam privatizuar që në 1995 përpara se të bëhesha gjyqtar. Nuk kam pasur detyrimin të ruaj dokumentet më shumë se 5 vjet sipas ligjit. Ndërsa për shtesat kam pasur të ardhurat e mia të ligjshme e të mjaftueshme për t’i ndërtuar.
Në 2011 kam blerë apartament në Don Bosko dhe bashkë me banorët e tjerë të pallatit ndërtuam të gjithë nga një shtesë nga i njëjti krah, shtesë e cila u legalizua në 2013”, u shpreh Broci në seancë.
