Kryeministri Ramush Haradinaj, duke folur në konferencën “Skenarët e finales së madhe ndërmjet Kosovës dhe Serbisë”, ka deklaruar se të rinjtë e Kosovës kanë pyetje të paqarta për qëndrimin e Bashkimit Evropian ndaj vendit – pse e ka lënë Brukseli vetëm Kosovën të izoluar e pse shqiptarët janë të ndarë.
Kryeministri i Kosovës ka qenë shumë I qartë dhe I hapur në kërkesat dhe kritikat e tij ndaj Bashkimit Evropian. Ai ka thënë se Kosovën Brukseli po e lë pas dore, e të rinjtë nuk e kuptojnë pse këto qëndrime ndaj Kosovës.
“Të rinjtë pyesin pse ne jemi kështu, pse s’jemi të bashkuar me Shqipërinë. Pse veç neve na ka lënë Evropa të izoluar? Çka i kemi bërë Brukselit? Pse të gjithë rreth nesh udhëtojnë?”, është shprehur Haradinaj.
Sipas tij të gjithë këto pyetje duhet t’u parashtrohen hapur partnerëve evropianë e të mos i mashtrojmë.
“Brukseli duhet ta dëgjojë shumë hapur se ne jemi lodhur me këtë gjendje si Kosovë. Nuk mundemi ne me i pritë ata kur t’iu del kohë me kry punë këtu. Nëse ne po vonohemi, tjerët po hynë”, ka thënë Haradinaj.
