Bizneset e ndërtimit po bëhen më pesimistë për ecurinë e çmimeve.
Në një anketë të Bankës së Shqipërisë, këto biznese janë të frikësuar se çmimet do të bien, madje me 6.8%.
Sipas tyre, mbioferta në ndërtime do të sjellë një ulje të çmimeve. Në këndvështrimin e bizneseve rënia e çmimeve ka qënë më e lartë seç pritej. Madje ndërtuesit shprehen skeptikë se kjo situatë (ndërtimet e tepruara) do të çojë në shkatërrimin e shumë bizneseve që po merren me ndërtime. Në fund të vitit të kaluar, në parashikimet e dhëna për vitin 2018 në lidhje me ecurinë e çmimeve, operatorët e tregut dhe agjencitë e pasurive të paluajtshme patën pritshmëri të ndryshme lidhur me ecurinë e çmimeve të apartamenteve gjatë këtij viti. Siç duket, bizneset e ndërtimit tashmë janë bërë pesimistë, kur shohin se po bëhen ndërtime të paorganizuara dhe dhënie tenderash të pabazuara në gjykime serioze, por në klientelizëm.
Këtë vit aplikohet edhe taksa mbi pronën, e cila ndryshon në objektet për banim dhe ato për biznes. Sipas aktorëve të tregut, kjo taksë e re nuk do të transferohet në çmim, por të mbahet nga pronarët, gjë që do i krijojë akoma më shumë vështirësi këtyre bizneseve.
Zhvillimi i ofertës dhe kërkesës në sektor me burime financiare jo formale po i bën nul parashikimet për çmimet. Logjika të çon se oferta më e madhe për banesa do të ushtrojë presion në uljen e çmimeve, teksa ne realitet ka ndodhur e kundërta, çmimet janë rritur. Por, megjithatë, ndërtuesit kanë rritur skepticizmin, duke u shprehur se, jemi në prag të shpërthimit të flluskës në sektor.
