Senatori republikan John McCain, një nga politikanët amerikanë më të përkushtuar së pari për çlirimin e Kosovës dhe më pas për pavarësimin dhe mbrojtjen e sovranitetit dhe integritetit territorial të saj, u njoftua se ka hequr dorë nga trajtimi mjekësor i një forme agresive të kancerit në tru, një vit pasi e kishte bërë të ditur diagnozën, shkruan sot Koha Ditore.
McCain, një hero i famshëm amerikan që u mbijetoi torturave në një kamp pengjesh lufte në Vietnam, senator nga shteti i Arizonës dhe kandidat republikan për president të SHBA-së në vitin 2008, kohët e fundit u shqua edhe si kritik i ashpër i politikave të presidentit aktual Donald Trump, me gjithë faktin se vijnë nga e njëjta parti.
“John ka hequr dorë prej pritjeve për mbijetesë”, thuhet në njoftimin e familjes, duke shtuar se përparimi i sëmundjes dhe mosha e McCainit, 81, kanë bërë që ai të heqë dorë prej trajtimit të kancerit.
Për këtë veprim kanë reaguar një sërë miq të tij të cilët luten për të.
“I gjithë klani McCain po bën atë që familja e tyre ka bërë prej brezash të tërë, po përballon sfidat me dinjitet”, shkroi senatori republikan Lindsey Graham.
Ish-astronauti Scot Kelley thotë se ka një respekt të thellë për heroin amerikan, që i shërbeu vendit në kohë lufte dhe paqeje, me guxim, dinjitet e dhembshuri për të tjerët. “Një udhëheqës i vërtetë i kohëve tona”, shton ai.
“John McCain, – thotë Paul Ryan, kryetari i Dhomës së Përfaqësuesve në Kongresin amerikan, – personifikon shërbimin e bërë këtij vendi”.
“Mendimet dhe lutjet e mia janë me John McCain dhe familjen e tij”, shkroi në Twitter kreu i pakicës demokrate në Senat, Chuck Schumer.
Familja e senatorit të Arizonës njoftoi të premten se, deri tani ai i ka tejkaluar pritshmërinë për mbijetesë, por “përparimi i sëmundjes dhe mosha e avancuar janë faktorë të pandalshëm. Me forcën e vullnetit që e karakterizon, John ka bërë zgjedhjen e tij, që ta ndalojë trajtimin mjekësor”.
