Presidenti amerikan Donald Trump njoftoi këtë të mërkurë se mund të dërgojë deri në 15 mijë ushtarë në kufirin mes SHBA-së dhe Meksikës për të ndalur ardhjen e emigrantëve, siç i quan ai ‘një grup njerëzish të rrezikshëm’.
Deri më tani, mbi 5,000 ushtarë janë dërguar në këtë kufi, ndërsa Trumpi ka thënë para reporterëve se “mund të çojë rreth 10-15 mijë ushtarë të tjerë”.
“Ai është një grup i rrezikshëm njerëzish”, ka thënë Trump në lidhje me karvanin e fundit të emigrantëve, shumica e të cilëve vijnë nga vendet e varfra të Amerikës Qendrore. “Ata nuk do të hyjnë në vendin”, shtoi Presidenti.
Siguria në kufirin jugor rrallë ka përfshirë trupa aktive të shërbimit ushtarak, ndaj, nëse do të dërgohen 15 mijë trupa atje, kjo do të ishte një dërgesë e ngjashme me përpjekjet e luftës amerikane në Afganistan.
Trump e ka kthyer fushatën goditëse, ndaj atij që ai e përshkruan si një “pushtim” emigrantësh të paligjshëm, në epiqendrën e fushatës së tij për kandidatët republikanë për zgjedhjet e së martës së ardhshme legjislative të mesmandatit në SHBA, shkruan tch.
Kundërshtarët thonë se retorika e tij është alarmuese dhe e mbushur me nota racizmi. Departamenti i Sigurisë së Brendshme njoftoi këtë të mërkurë për atë që e përshkroi si “një krizë e paprecedentë në kufirin tonë jugor”.
Gjithsesi, sipas shifrave të vet këtij Departamenti, numri i emigrantëve të paligjshëm të kapur në vitin 2018 është vetëm 400 mijë, me rreth 25% më pak sesa në vitin 2000. Ndryshimi i vetëm që veçohet prej Departamentit në fjalë është fakti se, në vitin 2000, thuajse të gjithë emigrantët e paligjshëm ishin të rritur beqarë, ndërsa sot gjysma e tyre vijnë familjarisht, apo si minorenë të pashoqëruar.
