Presidenti Trump ka nisur udhëtimin e parë jashtë vendit pas zgjedhjeve të mesit të mandatit me një goditje ndaj presidentit francez, duke postuar në Twitter se thirrja e tij për ta ndërtuar një ushtri evropiane është fyese.
Presidenti amerikan arriti në Paris të premten për shënimin e përfundimit të Luftës së Parë Botërore, por do të mungojë në një samit për bashkëpunim botëror, i cili fillon në të njëjtën ditë. “Presidenti i Francës, Macron, sapo ka këshilluar që Evropa ta ndërtojë ushtrinë e vet për ta mbrojtur veten nga SHBA-ja, Kina dhe Rusia. Shumë fyese, por ndoshta Evropa së pari duhet ta paguajë pjesën e vet për NATO-n, gjë të cilën SHBA-ja e kryen në mënyrë të mrekullueshme!”, shkruhet në postimin e Trumpit në Twitter.
Ai pritet të takohet drejtpërdrejt me presidentin francez dhe të marrë pjesë në shënimin e përvjetorit të Luftës së Parë Botërore. Sidoqoftë, ai do të largohet nga ky tubim para se të mbahet Forumi i Paqes, që vlerësohet si pjesa kryesore e këtij organizimi. Presidenti francez ka thënë se qëllimi i këtij forumi është që përllogaritjet e gabuara të fuqive botërore në Luftën e Parë Botërore të mënjanohen edhe më tepër nga vendime të përbashkëta në shekullin XXI.
Përndryshe, Trumpi kishte planifikuar që ta organizojë një paradë ushtarake në Uashington për ta shënuar këtë përvjetor, por e kishte anuluar atë për shkak se ishte ankuar në çmimin e lartë të organizimit, të cilin ia kishin kërkuar autoritetet e qytetit. Ai do ta fillojë vizitën e tij me takimin me presidentin francez dhe vizitën në një fushëbetejë të Luftës së Parë Botërore. Zyrtarët e Shtëpisë së Bardhë deklaruan se orari i ngjeshur i Trumpit bëri që të mos organizohen takime me udhëheqës të tjerë, përpos me atë të Francës. Ata pritet të bisedojnë për Sirinë, Iranin, Jemenin dhe për të ardhmen e tregtisë mes Amerikës dhe Evropës shkruan “The Guardian”
