Sa më shumë i afrohemi “datës së gjykimit” për hapjen e negociatave, aq më e qartë bëhet fakti se nuk kemi një fushëpamje horizontale, por një fushëpamje vertikale, që do të thotë kjo qeveri e ka gremisur Shqipërinë në gropë, para se ta integrojë në Europë.

Gropa shihet nga të gjitha planet. Nëse do të marrim atë të financave, borxhi publik që ka akumuluar kjo qeveri ka shkuar në stratosferë me mbi 73%, duke kaluar fashën europiane të Traktatit të Manstritit e cila e ka vendosur kufirin tek 60%, ama edhe këtu për shtete me kapacitet të fortë ekonomik. Po në lëmin e financave, kjo gropë vazhdon e bëhet më e thellë po të analizojmë sistemin e taksave në Shqipëri, që jo vetëm e ka tredhur ekonominë shqiptare por i ka çuar shqiptarët në zgrip. Mjafton të shohësh shirën prej 400 mijë aplikantësh për lotarinë amerikane për të kuptuar turra-vrapin e shqiptarëve për të dalë nga Edi-gropa.

Në fushën e investimeve publike, më parë investitorët shkelin në Hënë sesa në mëhallën ekonomike të Edi Gropës . Nga investitorët e prurjeve të qeverisë Berisha tanimë ka ngelur vetëm zyra boshe e të braktisura dhe ata pak investitorë të mbetur nga inercia e tranzicionit i sheh duke braktisur hotelet me valixhe në dorë.

Në fushën e rendit dhe sigurisë s’kemi pse kërkojmë me qiri në dorë për të gjetur ndonjë krim sepse ka dalë sheshit.  Mjafton të shohësh ministrat e Brendshëm, Sajmir Tahirin dhe Fatmir Xhafën për të kuptuar se kjo është qeveri e Gropës së Drogës dhe jo Europës. Narkotrafikanti Tahiri del lirisht e pi kafe në mes të Tiranës ndërsa Fatmir Xhafa hedh ende firmën e ministrit në survejime opozitare. Kanabisi vazhdon blerim mbuluar ndërsa Edi Rama shullëhet brenda gropës me drogë dhe korrupsion.