Kryebashkiaku i Shkodrës, Bardh Spahia, ka reaguar përmes rrjeteve sociale për situatën problematike në qarkun Shkodër pas reshjeve të shiut.
Bardh Spahia thotë se grupet e punës ndodhen në terren dhe kanë marrë masat për çdo rast që paraqitet. Më tej Spahia i bën thirrje KESH të informojë mbi situatën si pasojë e shkarkimeve nga hidrocentralet e kaskadës së Drinit që të mos gjendemi në situata të paparashikuara.
Statusi nga Bardh Spahia
Po ndjek me vëmendje situatën që kanë krijuar reshjet e shumta në Bashkinë Shkodër. Grupet tona të punës ndodhen në terren dhe kemi marrë masat për çdo rast që mund të paraqitet. Kërkoj bashkëpunimin e banorëve që në rast emergjence të kontaktojnë me strukturat e bashkisë për evakuim apo çdo nevojë tjetër që mund të paraqitet.
Si pasojë e shkarkimeve nga hidrocentralet e kaskadës së Drinit parashikohen orë të vështira, prandaj i bëj thirrje drejtuesve të KESH të informojnë në kohë dhe mënyrë periodike mbi prurjet dhe shkarkimet që të mos gjendemi në situata të paparashikuara.
