Kreu i Partisë Demokratike Sali Berisha ka reaguar në rrjete sociale në ditën e nderimit të viktimave të Srebrenicës.
27 vite më parë u shënua gjenocidi serb ndërsa Berisha shprehet se dënon me forcë aktin makabër të forcave që kryen këtë barbari.
Ndër të tjera Berisha dënon qëndrimin aktual të Presidentit të Serbisë Aleksandër Vuçiç të cilin e quan frymëzues të gjenocidit të Srebrenicës.
Reagimi i plotë i Berishës
Sot dita e nderimit të viktimave të Srebrenicës! Të dashur miq, sot është dita e nderimit të viktimave të barbarive, genocidit serb në Srebrenicë.
27 vite më parë, forcat ushtarake dhe milicia e serbëve të Bosnjës, së bashku me njësi paramilitare dhe policore të ardhura nga Serbia, nën komandën e gjeneralit famëzi, Ratko Mlladiç, vranë, masakruan në genocidin më të tmerrshëm të pas Luftes së Dytë Botërore në Europë, 8 mijë femijë, gra, burra, myslimanë boshnjakë, vetëm e vetëm se i perkisnin një tjetër etnie dhe besimi fetar.
Duke shprehur nderimin më të thellë për viktimat e genocidit serb në Srebrenicë, dënoj me forcë aktin makabër të forcave që kryen këtë barbari të tmerrshme.
Dënoj gjithashtu edhe qëndrimin aktual të Presidentit të Serbisë, Aleksandër Vuçiç, i cili me thirrjen e tij “për çdo serb të vrarë të vriten 100 myslimanë”, është një frymëzues kryesor i genocidit të Srebrenicës, vendi i të cilit është në bankën e akuzës në Gjykatën Ndërkombëtare të Hagës. sb
