Zvicra është kualifikuar në raundin e 1/8 të Kupës së Botës. Helvetët mundën me rezultatin 3-2 Serbinë në raundin e tretë dhe të fundit të fazës së grupeve të Botërorit, duke i treguar “derën e daljes” këtyre të fundit që pretendonin po ashtu të shkonin më tej.
Një prej autorëve të golave të kombëtares zvicerane ishte futbollisti me origjinë shqiptare, Xherdan Shaqiri, duke i treguar edhe një herë serbëve se janë “preja” e tij e preferuar.
Ndryshe nga ndeshja e kaluar, sonte ai bashkë me Xhakën nuk mundën të festojnë me shqiponjën dykrenare pasi kjo është ndaluar kategorikisht nga FIFA.
Megjithatë gjithçka ishte organizuar mjaft bukur nga të dy shqiptarët. Siç shihet edhe në foto, në momentin e festimit, si Xhaka ashtu edhe Shaqiri shkojnë në cepin e fushës. Ata bashkojnë kokat dhe hapin krahët njësoj si shqiponja dykrenare në flamur. Të mrekullueshëm!
Festë fantastike dhe ide gjeniale e dy lojtarëve që përfaqësojnë Zvicrën, por kurrë s’e kanë mohuar gjakun e tyre shqiptar. Edhe pse FIFA kishte paralajmëruar, aty ku thërret gjaku, siç duket gjithmonë gjendet zgjidhja.
