Ministri i Brendshëm, Fatmir Xhafaj duket se i ka ditët e numëruara në këtë ministri, pasi pritet që të shkarkohet nga kryeministri Edi Rama.

Burime të sigurta për 55News.al bëjnë me dije se prej disa kohësh marrëdhëniet mes Edi Ramës dhe Fatmir Xhafajt janë tepër të acaruara, dhe për këtë, Rama po përgatitet që të shkarkojë nga detyra Ministrin e Brendshëm.

Xhafaj, po ashtu po luftohet shumë nga grupe rivale brenda PS-së, dhe mësohet se Rama e ka vendosur që ai të largohet nga detyra.

Rama po mendon edhe për zëvendësuesin e tij, dhe burimet bëjnë me dije se ai ka në mendje si pasardhës të Xhafajt, Belinda Ballukun, e cila tani mban postin e Drejtoreshës së “Albcontrol”.

Balluku nuk është një emër i panjohur për publikun shqiptar, e aq më tepër për kryeministrin Rama, pasi ajo ka mbajtur postin e drejtoreshës së Kabinetit të Bashkisë, kur Rama ka qenë në krye të Bashkisë së Tiranës.

Belinda Balluku, përveç se është njeri i afërt me Edi Ramën, ajo është e fuqishme si në aspektin ekonomik dhe po ashtu në atë politikë.

Por, në fakt, një tjetër kandidaturë potenciale për të zëvendësuar Xhafajn është edhe kreu i grupit të PS-së, Taulant Balla.

Edhe pse Balla, tashmë është në qendër të skandaleve, ku ka dalë i përfshirë dhe i lidhur me shumë trafikantë droge, Rama po e mendon si zëvendësues të Fatmir Xhafajt.

Deri tani nuk dihet se cili prej të dyve do të jetë pasardhësi i Xhafajt, por ajo çfarë dihet me saktësi është se ai është drejt largimit si ministër.

/55News.al/