Ambasada shqiptare në Londër u bënë thirrje të gjithë shqiptarëve që duan të ikin në Mbretërinë e Bashkuar të tregojnë kujdes, pasi ekzistojnë disa skema mashtrimi.

Mos bini pre e mashtrimeve kompjuterike online! Duke marrë shkas nga disa histori të përsëritura, ku shtetasve shqiptarë u ofrohet nëpërmjet facebook, linkedin, apo email, vend pune nga persona që hiqen si “Kryetar të Bordit Seleksionues” apo nga “Seksioni i Burimeve Njerëzore” të disa kompanive “fantazma”, me kontrata pune deri në tre vjet dhe të rinovueshme, për të punuar në Mbretërinë e Bashkuar, ju bëjmë thirrje të ndërprisni menjëherë çdo komunikim me këta persona. Sipas kësaj skeme mashtrimi, ju do të merrni njoftime të njëpasnjëshme mbi “suksesin dhe potencialin e kandidaturës tuaj”, derisa do t’ju kërkohet të paguani rreth 1000 paund britanik me Money Gram apo Western Union për shpenzime të procedimit të vizës. Informacioni zyrtar për këdo që është i kualifikuar dhe do të punoj në Mbretërinë Bashkuar është këtu: https://www.gov.uk/tier-2-general dhe atje fare lehte mund të verifikoni nëse kompania që ju ka ofruar punën është e licencuar apo jo për qëllime të pranimit të emigranteve në punë”, thuhet në njoftimin e ambasadës.

Ambasada nënvizon gjithashtu se “për shkak të Brexit, janë ashpërsuar kushtet për pranimin e punonjësve emigrantë, pranohen vetëm punonjës të (super)kualifikuar dhe kufiri minimal i kontratës së punës është rreth 50 mijë paund britanik në vit.”.