Duke konsideruar si një ndër prioritetet e qeverisë zhvillimin e qeverisjes elektronike e të shërbimeve publike, me qëllim rritjen e transparencës, Posta Shqiptare dhe Agjencia Kombëtare e Shoqërisë së Informacionit, do të nënshkruajnë  ditën e premte, datë 25 Janar 2019, ora 10:00, në ambientet e Drejtorisë së Përgjithshme të Postës Shqiptare, marrëveshjen për kryerjen e shërbimeve të portalit e-Albania, në zyrat postare.

Falë kësaj marrëveshjeje, qytetarët shqiptarë në të gjithë Republikën e Shqipërisë, mund të aksesojnë pranë sporteleve të Postës Shqiptare, të gjitha shërbimet që ofrohen nga portali e-Albania.
Portali e-Albania është tashmë i aksesueshem nga sportelistët e zyrave postare, me qëllim që qytetarët dhe bizneset të përfitojnë shërbimet elektronike të institucioneve publike të ofruara nga ky portal, pa shpenzuar kohë në zyrat e administratës si dhe duke evituar burokracitë e panevojshme.
Posta Shqiptare e ofron këtë shërbim, pasi disponon rrjetin postar me shpërndarjen më të gjerë territoriale, infrastrukturën e nevojshme dhe stafin e trajnuar për t’iu përgjigjur në kohë dhe me efikasitet kërkesave të qytetarëve.