Qeveria duhet të jetë më e kujdesshme në menaxhimin e financave publike duke zbatuar edhe rekomandimet e Fondit Monetar Ndërkombëtar.
Ekspertët e ekonomisë, sqarojnë për SCAN se përplasja e shifrave midis FMN-së dhe Ministrisë së Financave sa i përket borxhit publik, tregon mungesë transparence nga ana e qeverisë dhe mospërfshirje të të gjitha detyrimeve në llogaritje.
Ndërsa vënë theksin edhe tek mënyra se si investohen këto para dhe tek rreziku që vjen nga Partneritetet Publike Private.
Sa i përket vlerësimit të raportit për sektorin bankar, ekspertët e ekonomisë sugjerojnë një rol më aktiv të Bankës së Shqipërisë dhe harmonizim më të mirë të politikave monetare me ato fiskale.
Në raport, FMN thotë se, borxhi publik nuk ka zbritur as në 2017 dhe as projektohet të ketë rënë në 2018, nën 70% të Prodhimit të Brendshëm Bruto. Ndërkohë që qeveria projekton se borxhi ka rënë në 69.9% të PBB në 2017.
