Kreu i INTERPOL-it serb, Milan Dimitrijeviç, ka thënë se përpjekjet e reja që Kosova të anëtarësohet në asamblenë e INTERPOL-it më 20 nëntor do të ishte rast precedent dhe dhunë ligjore.

Sipas tij, anëtarësimi i Kosovës në INTERPOL do të krijonte probleme jo vetëm për Serbinë, por edhe shtete tjera.

“Ministri Stefanoviq qartë i ka përmendur problemet e Serbisë përfshirë edhe ato të sigurisë, krimit dhe ligjit. Udhëheqësia e INTERPOL-it me vite është e njohur me arsyet dhe argumentet e Serbisë dhe është e qartë mënyra se me të cilat kushte dikush mund të bëhet anëtar i ri”, deklaroi Dimitrijeviq për “RTS”, transmeton Lajmi.net.

Ai ka thënë se anëtarësimi i mundshëm i Kosovës do të ishte shkelje e Rezolutës 1244, shkelje e rregullave të INTERPOL-it dhe do të krijonte shumë pasiguri.

“Bëhet fjalë për ndryshim të tezave. Bashkëpunimi i INTERPOL-it dhe UNMIK-ut zgjat nga viti 2002 dhe mbulojnë gjithë hapësirën andaj nuk ekziston asnjë argument që me këtë bashkëpunim nuk është e mbuluar e gjithë hapësira”, u shpreh ai.