Kryetari i Lëvizjes Vetëvendosje, Albin Kurti, ka thënë sot se presidenti Thaçi duhet ti ndal “pazaret” territoriale me Serbinë. “Në vend të pazareve territoriale të presidentit me Serbinë duhet të kalojmë tek kërkesat tona që kemi ndaj këtij shteti”, tha Kurti.
Ai tha se urgjentisht Kuvendi i Kosovës duhet të mbajë dy seanca plenare për përgatitjen e Kosovës për vazhdimin e bisedimeve. Në një konferencë për media, Albin Kurti, tha se në seancën e parë të Kuvendit do të duhej të shqyrtohej raporti që është dërguar nga qeveria në lidhje me marrëveshjet paraprake të dialogut 6-vjeçar me Serbinë, për të cilin Kurti tha se Kryetari i Kuvendit po e mban të bllokuar këtë raport.
Dhe në seancën e dytë Kurti tha se do të duhej të shqyrtoheshin dhe të krijohet një listë me kërkesa ndaj Serbisë. Sipas Kurtit kjo listë do të duhej t’i përmbante këto kërkesa:
-Njohja juridike e Kosovës nga Serbia dhe kërkesa që ajo ta ndryshonte kushtetutën e saj dhe ta heq fjalinë ku thuhet se krahina e Kosovës dhe Metohisë është pjesë e territorit të Serbisë.
-Zbardhja e fatit të të pagjeturve, në Kosovë ka pasur krime lufte e krime kundër njerëzimit të cilat i ka kryer Serbia dhe ende nuk ka kërkuar falje.
-Reciprociteti i njohjes së të drejtave të pjesëtarëve të Kosovës që jetojnë në Serbi e anasjelltas.
-Të na i kthejë regjistrat civilë e kadastrave. Të na e paguajë dëmin e luftës.
“Nuk jemi shtet serioz nëse nuk e kërkojmë borxhin” tha Kurti ai tutje shtoi se duhet unifikim i partive politike në çështjen e dialogut.
“Jam optimist që mund ta ndërtojnë konsensusin parlamentar e qeveritar për kërkesat tona ndaj Serbisë. Është dëm i madh për demokracinë tonë që na ka hyrë Serbia në mees e na ka përçarë”, ka deklaruar Kurti.
