Është një skandal i pabesueshëm mediatik: Gazetari gjerman dhe eksperti i Putinit, Hubert Seipel, thuhet se ka marrë disa qindra mijëra euro pagesa sekrete nga Rusia.

Siç raportojnë ekskluzivisht ZDF dhe SPIEGEL, Seipel thuhet se ka marrë gjithsej 600 mijë euro në një ‘marrëveshje sponsorizimi’ nga marsi 2018. Shuma ishte menduar për një libër të gazetarit. Bëhet fjalë për një libër mbi “peizazhin politik në Federatën Ruse”.

Sponsor kryesor është një kompani ruse. Sipas ZDF, pas saj qëndron oligarku rus, Alexei Mordashov. Mordashov është një i besuar i ngushtë i Putinit dhe ka qenë në listat e sanksioneve të SHBA dhe BE që nga shkurti i vitit 2022.

Libri i sponsorizuar u botua në vitin 2021 me titullin: “Fuqia e Putinit: Pse Europa ka nevojë për Rusinë”. Shtëpia botuese Hoffman&Campe, e cila botoi librin, mohoi se kishte dijeni për pagesën.

Dhe kjo nuk duket se ka qenë pagesa e vetme e Kremlinit për Seipel: ZDF gjithashtu raporton se gazetari kishte nënshkruar një kontratë të ngjashme edhe në vitin 2013- atëherë ndoshta ishte për librin e tij të parë për despotin e Kremlinit, Vladimir Putin, me titull: “Brenda pushtetit të Putinit”, botuar sërish nga Hoffman&Campe.

Tani shtëpia botuese po ndalon shitjet e librave të Seipel për Putinin. Botuesi nga Hamburgu njoftoi të martën se për shkak të raportimeve në media, ka vendosur të mos i ofrojë këto libra në shitje.

Norddeutscher Rundfunk (NDR) njoftoi gjithashtu të martën në mbrëmje se po shqyrtonte hapat ligjorë. Sipas informacioneve, gazetari, fitues i çmimit Grimme, prodhoi një dokumentar për Putinin për transmetuesin publik ARD në vitin 2012 dhe realizoi në vitin 2014, intervista me presidentin rus dhe sinjalizuesin Edward Snowden, i cili u largua nga SHBA.