Kreu i Shtetit, Ilir Meta ka vendosur ditën e sotme që të dekretojë nxjerrjen në lirim të oficerit me gradë madhore, Sandër Lleshin.

Ishte Lleshi, i cili ka kërkuar që ai të dalë në lirim, me qëllim që të emërohet ministër i Brendshëm.

Vendimi për nxjerrjen në lirim të Lleshit, duket se është një hap pranë dekretimit të Sandër Lleshit si ministër i Brendshëm.

Njoftimi i Presidencës:

NXJERRJEN NË LIRIM TË OFICERIT ME GRADË MADHORE

 Në mbështetje të nenit 93, të Kushtetutës, të nenit 9, pika 3, shkronja “g”, të ligjit nr. 64/2014, “Për pushtetet dhe autoritetet e drejtimit e të komandimit të Forcave të Armatosura të Republikës së Shqipërisë”, i ndryshuar, të nenit 26 pika 1, shkronja “ç”, të ligjit nr. 59/2014 “Për karrierën ushtarake në Forcat e Armatosura të Republikës së Shqipërisë”, me propozim të Ministrit të Mbrojtjes  nr. 8210/1 prot.,  datë 15.11.2018,

D e k r e t o j

Neni 1

 Gjeneral Brigade Sandër Ndue Lleshaj, nxirret në lirim.

Neni 2

 Ky dekret hyn në fuqi menjëherë.

Nr. i Dekretit 10955

Tiranë, më 16.11.2018