Deputeti i LSI-së, Edmond Panariti me anë të një postimi ka reaguar në lidhje me protestën e studentëve, si dhe kërkesën e tyre për dyfishim të buxhetit.
Panariti ka shkruar se Kosova, u jep me buxhet për 2019, studentëve dhe pedagogëve të saj 292 milion Euro, ndërsa ne vetëm 78 milion. Deputeti i LSI ka vijuar postimin duke theksuar se mos investimi në arsim dhe shkencë është fatalitet për vendin, ushqen braktisjen e tij nga të rinjtë.
“Studentët tanë me kërkesën e tyre minimaliste duan të mbështeten të paktën sa gjysma e studentëve të Kosovës për arsim dhe kërkim shkencor! Kjo është kërkesë minimale! Ndërsa Qeveria u thotë jo?! Kërkesa e studentëve për dyfishim të buxhetit të arsimit së bashku me të tjerat, duhet të realizuar me urgjencë! Amendimet e ligjit për buxhetin të propozuara nga ne, duhet të jenë krye-axhendë e seancës të jashtëzakonshme kuvendore . Pse jo që nesër! Dhe ne do të jemi te gjithë atje, për ta miratuar madje fare pa debat atë! Për të kuptuar se ne çfarë borxhi jemi me studentet tanë, mjaft të shohim se Kosova, u jep me buxhet për 2019, studentëve dhe pedagogëve të saj 292 milion Euro, ndërsa në vetëm 78 milion! Pra ne japim rreth katër herë më pak??!!! Mos investimi në arsim dhe shkencë është fatalitet për vendin, sepse ushqen braktisjen e tij nga të rinjtë, e plak Shqipërinë dhe largon investitorët, të cilet nuk investojnë në një vend ku populli plaket dhe nuk arsimohet”.
