Kryetari i PD, Sali Berisha, deklaroi këtë të mërkurë në një takim me ekspertët se patronazhistët janë shndërruar në një specie shkatërrimtare për administratën.

Sipas Berishës, institucionet duhet të çlirohen prej tyre pasi ky është një kusht për të funksionuar shteti ligjor.

“Policia do të jetë e profesionistëve dhe jo e patronazhistëve. Patronazhistët janë shndërruar në një specie shkatërrimtare për administratën. Dje më shkruante një punonjës i OSHEE-së; doktor, të gjithë drejtuesit e një sipërmarrje shumë të rëndësishme për vendin, janë zëvendësuar me patronazhistët, të cilët nuk bëjnë asnjë punë, vetëm krijojnë mekanizma për të vjedhur qytetarët.

Kështu është në polici, kudo. Patronazhistët tani janë ndihmësa të gjykatësve në Gjykatën e Lartë. Po. Pra, administrata, institucionet do të çlirohen prej tyre. Ky është një kusht për funksionuar shteti ligjor.

Më pyetën një ditë; nga do e nisni. Sa herë që të më pyesë nga do e nisim, unë kam vetëm një përgjigje: Zbatimi i ligjit. Do nisim nga zbatimi i ligjit. Të gjithë nën ligjin. Dhe këtu pastaj makineria jonë funksion gjithnjë e më mirë.

Artani dha disa të dhëna shumë interesante, në kuptimin se ekziston ideja se këto lumenjtë narko-eurosh sjellin prosperitet, në fakt jo. Në fakt pa këto narko-euro të ardhurat kanë qenë më të mëdha, rrogat janë rritur dyfish dhe pikërisht se u luftua krimi, Shqipëria u bë vend i preferuar për investimet dhe investitorët e huaj.

Sot Shqipëria është vendi i TAP, i kaskadës së Devollit, Rrugës së Kombit, pra i projekteve të cilat kanë dhe do kenë një ndikim të fuqishëm në këtë vend. Por këto nuk bëheshin pa rend dhe ligj. Ndaj dhe ju garantoj edhe njëherë se ky mbetet objektivi ynë më madhor.

Lufta me zero tolerancë ndaj krimit ka qenë dhe do të mbetet moto e qeverisjes së Partisë Demokratike.”-tha Berisha