Sindikatat e Punonjësve të Universiteteve të Shqipërisë do të mbajë sot protestën kombëtare, një përshkallëzim ky i lëvizjes universitare, kërkesat ekonomike të së cilës nuk janë marrë parasysh nga qeveria.

Në shpalljen e publikuar në rrjetet sociale për Lëvizjen Universitare, Sindikata e Punonjësve të Universiteteve Publike u bën thirrje pedagogëve, akademikë, studentëve, shoqërisë civile, aktivistëve, gazetarëve, përfaqësuesve të institucioneve publike që lidhen me arsimin dhe shkencën, për bojkot dhe protestë kombëtare universitare.

Protesta do të mbahet në orën 11:00, tek Korpusi Qendror i UPT-së. “Misioni akademik vazhdon” thuhet në fund të shpalljes së kësaj lëvizjeje, e cila ka moto: “Arsimi i Lartë Publik, prioritet kombëtar”.

Kryetari i Sindikatës së pedagogëve, Aleksandër Kovaçi, ka paralajmëruar se protesta mund të shkojë deri në grevë urie në rast se qeveria vazhdon të shpërfillë kërkesat e pedagogëve dhe punonjësve të universiteteve publike.

Në takimin e fundit që organizuan, Kovaçi tha: "Ne nuk e kemi vetëm te rritja e rrogave, edhe kërkimi shkencor është thelbësor në Arsimin e Lartë. Dhe, nuk jemi, nuk jemi, e përsërisim edhe njëherë, unë si kryetar sindikate posaçërisht, nuk jam që të kalojmë në atë fazën e fundit të kërkimit të së drejtës sonë në mënyrë paqësore, që është faza e grevës së urisë, e ngujimit, por është kërkesë e disa anëtarëve të sindikatës që në gjendjen e shurdhmërisë së qeverisë dhe të autoriteteve që kanë në dorë zhvillimin e universitetit, kemi gjendjen e njerëzve që nuk shohin çfarë është realiteti apo të atyre që nuk kanë dëshirë për ta ndryshuar këtë realitet, mund të shkojmë edhe deri në këtë fazë.”