Pas përfundimit të aventurës së vështirë në La Liga, ku me ekipin e tij Deportivo la Coruna ra nga kategoria, e ardhmja e Clarence Seedorf do të jetë në Afrikë. Ai u zyrtarizua si trajneri i ri i Kamerunit.

Në të kaluarën hollandezi ka qenë shumë pranë dhe stolit të Shqipërisë, por zgjedhja e federatës në atë periudhë shkoi për Christian Panuccin. Zgjedhja e parë për Kamerunin ishte ish-trajneri i Anglisë Sven Goran Eriksson, por që nuk u gjet një marrëveshje dhe më pas u arrit akordi me Seedorfin.

I lindur në vitin 1976, 4 herë fitues i Ligës së Kampionëve me 3 ekipe të ndryshme, në të kaluarën 42-vjeçari e ka drejtuar stolin e ish-ekipit të tij Milanit, kinezëve të Shenzhen dhe Deportivo La Corunas.

Zyrtarizimi u bë nga ministri i sporteve të Kamerunit, i cili bëri të qartë se Seedorfi do të ketë të paktën 1 vit për të përgatitur skuadrën para Kupës së Afrikës që do të zhvillohet pikërisht në Kamerun, në qershorin e 2019.

Nuk janë bërë të ditura detaje për kontratën që dy palët kanë firmosur. Zëvendës-trajner i Kamerunit do të jetë një tjetër legjendë e futbollit holandez, Patrick Kluivert.