Ky sezon ka ardhur shumë ndryshe për Ilir Dajën dhe Orges Shehin, të cilët para një viti ishin pjesë e një skuadre dhe kishin të njëjtin qëllim.

Daja kërkon të fitojë gjithçka ashtu si edhe Orges Shehi, por këtë herë për skuadra të ndryshme.

Daja këtë vit është në drejtimin e Flamurtarit, ku ka marrë tre fitore dhe një barazim në katër ndeshje zyrtare, ku po të njëjtën gjë e ka bërë edhe Orges Shehi te Skënderbeu, i cili është për herë të parë në postin e trajnerit.

Daja është në rrugën e mbarë, po ashtu si edhe Shehi, megjithatë, e hëna do të jetë dita e së vërtetës, pasi këto skuadra do të përballen me njëra-tjetrën në stadiumin “Flamurtari”. Një ndeshje që do të përcaktojë udhëheqësin e ri të Superiores.

Daja i ka të gjithë të gatshëm, por sfida kundër Shkumbinit në Kupën e Shqipërisë tregoi se ka pak vështirësi me gjetjen e rrjetës, gjë për të cilën Skënderbeu tregoi të kundërtën  duke siguruar një fitore pa probleme në Koplik.

Megjithatë, mund të themi se janë dy skuadra me të njëjtin nivel, diferencën mund ta bëjë sulmi, Flamurtari ka disa emra, ndërsa Skënderbeu përdor Krasniqin apo Muzakën e Filin. Gjithsesi duhet parë të hënën se cili do jetë më i fortë dhe më afër titullit.