Kryesia e Lidhjes Demokratike të Kosovës ka qëndruar në Deçan gjatë ditës së sotme ku ka takuar strukturat e degës.

Sekretari i Përgjithshëm i LDK-së, Ismet Beqiri falënderoi degën për angazhimin dhe kontributin e të gjithë veprimtarëve të LDK-së, pavarësisht specifikave të Deçanit.

Si në çdo takim edhe sonte, dialogu, ndryshimi i kufijve, formimi i Forcave të Armatosura, listat e fryra të veteranëve, veprimet e LDK-së dhe Grupit Parlamentar ishin temë kryesore e diskutimit.

Beqiri gjithashtu kërkoi mobilizim dhe aktivitet të shtuar të degës, sepse, siç tha ai, “tashmë LDK-ja është e gatshme për zgjedhje nacionale, të cilat LDK-në do ta nxjerrin fituese”.

Gazmend Muhaxheri, kryetar i Komunës së Pejës, kërkoi nga të gjithë unitet dhe mobilizim pasi që, siç tha ai, “Kosovës i nevojitet LDK-ja në qeverisje”.

Deputetja Besa Gaxherri foli për lëvizjet e Grupit Parlamentar rreth mocionit për rrëzimin e kësaj qeverie.

Hykmete Bajrami, deputete e Kuvendit të Kosovës, foli, siç raporton LDK përmes një komunikate për media, për “rrezikun që vendi është kanosur dhe për rrezikimin e partneritetit tonë me SHBA-të dhe shtetet e BE-së”.

Ndërsa, deputeti Armend Zemaj ka theksuar strategjitë punuese të Grupit Parlamentar, “shumë të suksesshme të cilat po reflektojnë pozitivitet dhe disponim të mirë në të gjitha strukturat dhe më gjerë”.

“Dega e LDK-së në Deçan, njëzëri kanë shprehur përkrahje ndaj të gjitha qëndrimeve të organeve të partisë dhe kanë ofruar mobilizim dhe shtim të aktiviteteve që shpejt LDK-ja të udhëheqë këtë vend”, thuhet në komunikatën e LDK-së.