Gjatë lëvizjes studentore (8-12 dhjetor 1990), forcat policisë përdorën dhunën ndaj studentëve kur lëvizja e tyre u zhvendos nga universiteti në rrugët e Tiranës. Ky fakt evidentohet në kërkesat e tyre, si dhe del në takimin e përfaqësisë së studentëve me kryetarin e Presidiumit të Kuvendit Popullor, RamizAlia, më 11 dhjetor 1990. Disa nga kërkesat e studentëve të paraqitura në mitingun e madh të mbajtur në “Qytetin Studenti”, ishin:

-Kërkojmë fajtorët të cilët dhanë urdhër të përdoret dhuna mbi studentët. Kërkojmë që ata të gjykohen para Qytetit Studenti.

-Kërkojmë të krijohet një komision prej studentësh dhe mjekësh për të verifikuar gjendjen e studentëve të plagosur.

-Kërkojmë pluralizëm politik si shkalla më e lartë e demokracisë së sotme. Si pasojë:

-Të lejohet krijimi i Organizatës së Pavarur Demokratike të Studentëve dhe Intelektualëve të Rinj, statuti i së cilës do të paraqitet për legalizim në Ministrinë e Drejtësisë.

-Duam që kjo organizatë të ketë deputetët e vet në Kuvendin Popullor.

-Kërkojmë liri të shtypit dhe të fjalës, pa censurë.

-Kërkojmë të sqarohet opinioni publik mbi të vërtetën e lëvizjes studentore.

U bëjmë thirrje të gjithë intelektualëve, personaliteteve, të gjithë atyre që duan Shqipërinë, të mbështesin kërkesat tona dhe të bashkohen me ne.

Qyteti Studenti më 10.12.1990