Tensionet e krijuara mes Serbisë dhe Malit të Zi janë komentuar nga politika opozitare në Shqipëri.

Fillimisht reagoi Partia Demokratike. Më pas Lëvizja Socialiste për Integrim deklaroi se dënon sulmin ndaj ambasadës së Malit të Zi në Serbi.

“Ne vlerësojmë se ngjarje të tilla dëmtojnë marrëdhëniet e bashkëpunimit mes shteteve, si dhe shkojnë kundër frymës të fqinjësisë së mirë dhe të integrimit mes dy vendeve që kanë objektiva të përbashkëta për Integrimin në Bashkimin Evropian.

Integrimi i vendeve të rajonit tonë mes tyre dhe me Bashkimin Evropian do të ndodhë pasi secili vend të ketë garantuar standartet e maturisë politike, paqes, të sigurisë, të bashkëpunimit mbi vlera të përbashkëta të Evropës së Bashkuar,” thuhet në deklaratën e LSI.

Ndërkohë qeveria shqiptare nuk ka dalë akoma me një qëndrim. Exit.al thotë se ka kërkuar nga qeveria një informacion nëse mbështesin Malin e Zi, por nuk ka marrë asnjë reagim, edhe pse Shqipëria tashmë drejton OSBE-në, e cila duhet të inkurajojë paqen dhe stabilitetin.

Megjithatë një reagim ka ardhur nga Ministri i Diasporës, Pandeli Majko.

“Ka më shumë se një arsye, për të qëndruar në krah të Malit të Zi dhe qeverisë së tij, përballë presioneve që papërgjegjshmëria e njohur serbe e rajonit po kërkon t’i imponohet. Kisha ka shume dhe Zot ka një”, shkruan Majko.