Tranjeri i Francës, Didier Deschamps, ka kërkuar tri gjëra nga lojtarët e tij për finalen me Kroacinë.
Ai ka kërkuar që në finalen e Botërorit “Rusia 2018” francezët të jenë të qetë, të kenë vetëbesim dhe përqendrim maksimal.
Franca është favorite për triumf, por Deschamps kujton se një gjë e tillë ishte konsideruar edhe më 2016, kur francezët u mposhtën në finalen e Euro 2016 nga Portugalia.
“Është kënaqësi e madhe dhe privilegj që të luash në një ndeshje të tillë. S’ka asgjë më të bukur si profesionist se që të luash në finalen e Botërorit. Jemi përgatitur më së miri që kemi mundur. Duhet të rrimë të qetë, të kemi besim dhe të jemi shumë të përqendruar – në këto tri pika jemi fokusuar për finale”, ka thënë ai në konferencën për media.
Deschamps ka thënë se rivali i Francës, Kroacia, ka shumë lojtarë të mirë dhe me përvojë e që mund t’i sjellin probleme “Gjelave”.
Deschamps ishte kapiten i Francës në triumfin në Botërorin 1998 dhe të dielën mund të bëhet vetëm personi i tretë pas Mario Zagallos së Brazilit dhe Franz Beckenbauerit të Gjermanisë që e kanë fituar Botërorin si lojtar dhe trajner.