Receta e tiramisusë klasike vijon të ngelet e preferuara.
Përbërësit
500g Mascarpone; 6 vezë të freskëta në temperaturë ambienti (ndani të verdhat nga të bardhat); 300-400g biskota Savoiardi; kakao e hidhur për spërkatje; 120g sheqer ; 5-6 filxhanë kafeje ekspres të vakët ku kemi tretur 2 lugë sheqer.
Një tavë me përmasa 30×20 cm.
Përgatitja
Rrahim me rrahësin elektrik të verdhat e vezëve dhe sheqerin derisa të bëhen si shkumë. Mascarpone-n e përpunojmë pak me pirun ose me lugë që të bëhet si krem. Më pas e shtojmë në tasin me të verdhat e vezëve. Vijojmë ta përziejmë me rrahësin elektrik një deri në 2 minuta.
Pastaj ne bëjmë marengë me të bardhat e vezëve, i shtojmë te tasi i kremit dhe i përziejmë me kujdes nga poshtë lart me spatula ose me lugë druri.
Kurse biskotat i lagim te kafeja e vakët, por kujdes, ato s’duhet të qullen shumë.
Pastaj i vendosim në tavë pranë njëra-tjetrës duke krijuar një shtresë, hedhim sipër një shtresë me krem, vazhdojmë me një shtresë tjetër biskotash me kafe dhe përsëri një shtresë kremi. Më pas e spërkasim me kakao të hidhur, e mbulojmë me letër alumini dhe e lëmë në frigorifer për një natë.
Ju bëftë mirë!