Është rikonfirmuar masa e sigurisë ‘arrest me burg' për 5 persona të cilët akuzohen për vrasjen e Devi Kasmit, më 29 janar në Tiranë.
Gjykata e Krimeve të Rënda nuk e ka zbutur masën e dënimit për Mario Meshinin, Malvi Dinellarin, Elton Hoxhën, Elton Halipaj dhe grekun Efthimios Efthimu.
41-vjeçari grek sipas hetimeve të prokurorisë është personi që ka ekzekutuar Kasmin. Mario Meshini dyshohet se ka nxjerrë në pritë viktimën, pasi ka pasur një komunikim telefonik me të, pak para atentatit. Ndërsa 3 persona e tjerë kanë ndihmuar Efthimios Efthimu për të kryer vrasjen.
Dosja e vrasjes së Devi Kasmit fillimisht u hetua nga Prokuroria e Tiranës, e cila disa ditë më parë shpalli moskompetencën për faktin se atentati dyshohet se është organizuar nga një grup i strukturuar kriminal. Motiv i vrasjes dyshohet se është prishja e pazareve të drogës jashtë vendit.
