Konfindustria i ka propozuar ministrisë së Financave dhe Ekonomisë, që në paketën fiskale të vitit 2019 të aplikojë taksën e sheshtë.

Në një njoftim për mediat, Konfindustria thotë, se politika fiskale e vendit për vitin 2019 duhet të kalojë në sistemin e taksës së sheshtë dhe me kah ulës të ngarkesës për qytetarët dhe bizneset e tregut të lirë.
Administratori i Përgjithshëm, Gjergj Buxhuku, i kujton autoriteteve shqiptare rastin e Italisë, për taksimin e sheshtë për qytetarët dhe bizneset.
“Vendimarrja politike shqiptare duhet të ndjekë me vëmendje dhe strategjinë e qeverisë së re të Italisë, për zbatimin e taksës së sheshtë/flat tax për qytetarët dhe bizneset. Ndryshimet thelbësore të politikës fiskale të Italisë si partneri kryesor tregtar do të kenë ndikim të drejtpërdrejtë në zhvillimet ekonomike në Shqipëri”, thuhet në njoftimin e shpërndarë për mediat.
Konfindustria nga ana tjetër vlerëson, se politika e deritashme e taksave përpjestimore dhe ngarkesës fiskale tërësore në rritje nuk ka qenë e sukseshme.
Rritja mesatare vjetore e PPB në më pak se 2.5% në 5 vitet e fundit, borxhi publik që nuk po shënon rënie nga niveli i 72% te PPB, informaliteti i lartë shprehur dhe në zhvleftësimin e fortë të panatyrshëm prej mbi 8% te Euro-s kundrejt Lek-ut, vendi i fundit në Rajon për tërheqjen e investimeve të huaja, emigracioni i shtuar dhe goditja e mirëqenies së shtresës së mesme, etj. Sipas Konfindustrisë janë tregues të qartë të nevojës për ndryshime thelbësore të politikave ekonomike dhe fiskale të vendit.