Policia e Gjirokastrës ka arrestuar një person për plagosjen e dyfishtë të mbrëmjes së djeshme para një pike bastesh sportive në këtë qytet.

Në prangat e policisë ka rënë Paolo Xhaferi, 39 vjeç, banues në lagjen “11 Janari”, Gjirokastër. Ai akuzohet për përkrahjen e autorit të krimit.

Xhaferi akuzohet se "ka transportuar me automjet nga Gjirokastra në drejtim të Delvinës, shtetasin K.Ll, i cili u shpall në kërkim pasi ditën e djeshme në lagjen '18 Shtatori', ka plagosur me armë zjarri shtetasit V.B dhe Xh.G, 36 dhe 52 vjeç, të dy banues në fshatin Lazarat, Gjirokastër", njofton policia.

Ndërsa dy personat e plagosur, Xhelo Gerveshi 52 vjeç dhe Valentin Buci 36 vjeç, ndodhen në spital jashtë rrezikut për jetën.

Policia po punon për kapjen e autorit Kristaq Lukani 40-vjeç dhe zbardhjen e plotë të rrethanave të ngjarjes.