Ka mbetur vetëm një muaj nga hapja e sezonit turistik, por edhe Vlora duket se nuk është ende gati.

55news.al solli para ditësh problemin e bregdetit të Divjakës, i cili është i tejmbushur me mbeturina. E njëjta situatë vihet re edhe me Vlorën, por kjo e fundit has një tjetër problem: aksi lidhës i rrugës transballkanike me autostradën Levan-Vlorë është tërësisht i amortizuar

Projekti për rregullim është pezulluar për shkak të mospagesës së kompanive kontraktore. Për të gjetur një zgjidhje provizore, është përcaktuar të ndërtohet një rrethrrotullim, ndërsa po punohet pa përcaktuar afate zyrtare të përfundimit të punimeve.

Sakaq, trafiku është devijuar edhe për shkak të punimeve në bulevard,i nisur dy javë më parë. Në një dalje publike kreu i bashkisë së Vlorës, Dritan Leli sqaroi detajet e projektit i cili do të ndërpresë punimet gjatë pikut të sezonit veror për të rinisur në shtator. Siç duket edhe ky sezon turistik do ta gjejë Vlorën pa një bulevard të ri.