Ligji i qeverisë për shembjen e Teatrit Kombëtar ka si argument kryesor se kompania që do të ndërtojë kullat është pronare kufitare. Por e vërteta është se Fusha shpk nuk është pronare kufitare me pronën e teatrit siç thotë qeveria në ligj. Kompania Fusha ka në pronësi të saj vetëm 298 metra katrorë dhe kjo pronësi nuk është kufitare me teatrin.
5522 metra katrorë të tjerë janë pronë e Teatrit Kombëtar që po grabitet dhe po i jepet kompanisë Fusha, 2100 metra katrorë janë në pronësi të Bashkisë Tiranë dhe vetëm 298 metra katrorë janë të kompanisë Fusha.
Bërja publike e dokumenteve nga Partia Demokratike vjen dy ditë pasi kreu i Hipotekës Valdrin Pjetri refuzoi të bënte publik përpara Komisionit të Edukimit dhe Kulturës, informacionin lidhur me pronësinë e zonës ku ndodhet Teatri Kombëtar.
Megjithëse anëtarët e opozitës në komision këmbëngulën të mësonin se sa metra katrorë ka në pronësi Fusha shpk dhe nëse prona e saj është kufitare me pronën e Teatrit, siç pretendon Kryeministri Rama, zoti Pjetri nuk iu përgjigj pyetjeve.