Një 34-vjeçar shqiptar është arrestuar nga karabinierët në Pulsano të Italisë pasi ndaj tij ishte lëshuar një urdhër arresti nga Gjykata e Bolonjas.

Bëhet fjalë për shtetasin Feim Lamaj, i cili tashmë është nën akuzë për përfshirje në organizata kriminale dhe trafik ndërkombëtar droge. Sipas hetimit që nisi në vitin 2015, Lamaj është në kërkim pasi akuzohet si pjesë e një organizate që trafikonte drogë nga Shqipëria në Itali me avionë ultra të lehtë. Vetëm në një rast, 120 kilogramë marihuanë iu sekuestruan grupit. Droga u kap më gusht 2015 në Ostuni të Italisë, pas transportit me një avion nga Shqipëria.

Gjatë kontrollit të banesës, karabinierët sekuestruan dy detektorë GPS, dy telefona celularë, një bllok shënimesh, 166.000 euro KESH si dhe një pasaportë dhe një dokument identiteti, me të njëjtin emër por mbiemër tjetër, që dyshohet se janë përdorur nga 34-vjeçari për tu shpëtuar kontrolleve policore. Megjithatë, verifikimi përmes shenjave të gishtave bëri të mundur zbulimin e identitetit të vërtetë të shqiptarit në kërkim.