Avokati i Safet Bajrit, Arbër Hoxha në një deklaratë nga Gjykata e Krimeve të Rënda u shpreh për mediat se Safet Bajri akuzohet vetëm për ndikim në garat sportive dhe mund të dënohet me burgim deri në 7 vjet.

“Safet Bajri akuzohet vetëm për ndikimi në garat sportive e cila është një vepër e cila dënohet me burgim deri në 7 vjet. Në këto kushte gjykata e la në fuqi arrestin me burg. Gjykata që mund të kishte vendosur garanci pasurore ose arrest shtëpie. E ofruam në masën 1 mln lekë ose sa ta kërkonte gjykata. Aktualisht masa e sigurimit për Safet Bajrin përveçse ndikim në garat sportive nuk ka asnjë akuzë tjetër. Nuk mund të shprehem për akuzat nga mediat e huja belge përderisa nuk ka fakte.” u shpreh avokati.

Gjykata e Krimeve të Rënda ka vendosur arrest me burg për 6 të arrestuarit gjatë aksionit të fundjavës në Shkodër e Tiranë, të koduar “Oaz”. Mes tyre ishte edhe Safet Bajri.

Gjykata e Krimeve të Rënda la në burg Safet Bajrin, Armir Grimën, Fabjol Rexhepin, Emrah Plaku, Ilir Bajrin dhe Astmer Bilalin.

Ndaj grupit Bajri rëndojnë akuzat, akuzat: “Vrasje me dashje e mbetur në tentativë”, në bashkëpunim, “Vrasje me dashje”, e kryer në bashkëpunim, “Prodhim dhe mbajtje pa leje të armëve dhe municioneve luftarake”, “Organizim i llotarive të palejuara”, “Pastrim i produkteve të veprës penale” të kryer në bashkëpunim, “Shtrëngim me anë të kanosjes ose dhunës për dhënie të pasurisë”, kryer në bashkëpunim, “Përkrahje e autorit të krimit”, ‘Moskallëzim krimi”, “Prodhim e shitje e lëndëve narkotike”.