Gazeta Shqiptare ka siguruar foton e të riut, i cili mbeti i vrarë gjatë përplasjes mes dy grupeve, ku “mollë sherri” duket se është bërë këngëtarja e njohur Elvana Gjata.

Ndërkaq, Gazeta Shqiptare ka mësuar edhe dinamikën e ngjarjes së rëndë që ndodhi dje në mbrëmje.

Kështu, rreth orës 21:00 në lokalin Monopol, në 2 tavolina të ndryshme kanë qenë duke pirë verë Ervin Mata, Fabiol Alushi si dhe Marviol Bilo si dhe një person tjetër i pa përfshirë në ngjarje.

Ndërsa në një tavolinë tjetër ka qenë Ervis Martini dhe Eljon Hato. Gjërat mes palëve kanë qenë të qeta dhe nuk kanë pasur komunikim. Rreth orës 21:30 në lokal ka mbërritur Fabiol Gaxha. Sapo e ka parë Mata i ka kërkuar të sqarohen, pasi tre javë më parë ai ka ngacmuar të dashurën e tij këngëtaren e njohur, Elvana Gjata së bashku me një vajzë tjetër të show bizit. Sapo është afruar Fabioli ka nisur konfrontimi fizik dhe Mata e ka goditur disa herë me grusht, duke e ulur në tokë. Ndërkaq, i ka ardhur në ndihmë Ervis Martini dhe Eljon Hato. 

Në këto momente, Fabiol Gaxha ka nxjerrë pistoletën. Menjëherë ka nisur shkëmbimi i zjarrit mes 2 palëve ku për pasojë ka mbetur viktimë Fabiol Gaxha dhe u plagos Ervis Martini dhe Eljon Hato. Autoret e ngjarjes pas të shtënave kanë dalë me shpejtësi nga lokali. Në kamera duket që njëri është larguar në këmbë në rrugicat e bllokut. Njëri është larguar me makinë, ndërsa i treti nuk është përcaktuar.

Policia ka mbërritur rreth 10 minuta pas ngjarjes pati nuk ka pasur asnjë telefonatë në sallën operative për sinjalizimin e ngjarjes.

Ndërkohë që janë shpallur në kërkim Ervin Mata, 31 vjeç, Fabio Allushi, 42 vjeç, si dhe Mevjol Bilo, 41 vjeç,  që të tre këta banues në Tiranë.