Ditën e djeshme Policia e Dibrës arrestoi shoferin e autobusit Edmond Sela, pasi ky i fundit u filmua duke rrahur disa fëmijë.

Ndërkohë pas arrestimit shoferi është shprehur se humbi kontrollin pasi nxënësit po pinin cigare brenda dhe po i digjnin sediljet e autobusit. Pasi u ka kërkuar disa herë nxënësve ta hidhnin cigaren dhe ata nuk kanë reaguar, por kanë qeshur, ky i fundit është nxehur dhe u është kundërvënë duke i qëlluar.

Shoferi Edmond Sela ishte me kontratë nga bashkia për të kryer transportin e nxënësve nga fshati Burim për në shkollën e Majtarës në Maqellarë.

Njoftimi i plotë i policisë për arrestimin:

Dibër - Pas denoncimit nga Ministria e Arsimit, te nje videojeje ku shfaqet një drejtues autobusi që ushtron dhunë ndaj dy nxenësve, sqarojmë se:

Policia e Dibrës menjëherë ka bërë të mundur identifikimin dhe shoqërimin në Komisariatin e Policisë, të drejtuesit të autobusit, shtetasin Edmond Sela, 35 vjeç, banues në fshatin Burim, Dibër.

Nga verifikimet e kryera ka rezultuar se shtetasi E.Sela, me automjetin e tij autobus, me targa AA 633 BO kryente transportin e nxënësve në rrugë dytësore nga fshati Burim për në shkollën e Majtarës, në njësinë admimistrative Maqellarë.

Në datë 4.10.2018, ky shtetas ka ushtruar dhunë ndaj dy nxënësve, pasi pretendonte se i kishin djegur me cigare sediljet e automjetit.

Në përfundim të veprimeve të para hetimore shtetasi Edmond Sela, u arrestua për veprën penale "Keqtrajtim i të miturit", parashikuar nga neni 124/b i Kodit Penal.

Gjithashtu rezultoi se kishte mangësi në dokumentacion, e për mangësitë e konstatuara do të procedohet administrativisht nga Policia Rrugore.

Drejtoria Vendore e Policisë Dibër është e angazhuar maksimalisht për sigurinë e qytetarëve, veçanërisht për sigurinë e fëmijëve dhe fton qytetarët, nxënësit, prindërit e mësuesit të denoncojnë çdo shkelje apo cënim të dinjitetit, shëndetit e jetës së tyre, duke garantuar një reagim të shpejtë profesional dhe dhe të paanshëm.